Siglir tar il cuntegn

Header

audio
Tge dovra in bun chanzlist u ina buna chanzlista? – in «recept»
Or da Actualitad dals 23.06.2021.
laschar ir. Durada: 04:30 minutas.
cuntegn

«Recept» per la buna chanzlia Michael Sutz sa tge qualitads ch'èn dumandadas

Michael Sutz sa exact, tge qualitads e duns ch’èn necessaris per manar ina chanzlia communala. Immediat suenter sia scolaziun mercantila ha el cumenzà sco chanzlist a Vuorz, nua ch’el ha lavurà indesch onns. Suenter è el stà otg onns chanzlist a Breil. Fin oz stat el sco revisur da l’uffizi da vischnancas en stretg contact cun vischnancas, chanzlists e chanzlistas.

Sin fundament da sias experientschas dat el suandants cussegls, sch’insatgi – prendain il cas ch’i saja ina dunna – less daventar chanzlista.

Persuna neutrala cun sensori per finanzas e dretg

Ina chanzlista dovria bunas abilitads da communitgar. Ella stoppia esser ina persuna neutrala en vischnanca e stoppia tractar tuts tuttina, di Michael Sutz. La persuna dovria era in bun sensori per dumondas da dretg e da finanzas.

Sco chanzlista stoppian ins avair pel dira. Pertge la populaziun na vegnia gea betg al spurtegl per engraziar per il quint da taglia, mabain per svidar il puppen u reclamar.

Scola mercantila u commerziala

Necessari saja ina buna scolaziun da basa – mercantila u commerziala. E suenter stoppia ina chanzlista adina esser pronta da sa scolar vinavant en diversas direcziuns.

Gist ina vischnanca pitschna dovria ina generalista che fetschia contabilitad, cas da dretg, correspundenza e protocols. En vischnancas pli grondas saja la chanzlista plitost il maun dretg ed il maun sanester da l’executiva. Là saja il dun da scriver e la savida en la sparta da dretg essenziala.

Indispensabla saja ina buna rait da contact cun auters chanzlists ed autras chanzlistas. Uschia sappian ins sa cussegliar, sch’i dettia problems. Gist per chanzlistas che lavurian persulas en ina chanzlia saja quai impurtant d’avair buns contacts che possian gidar vinavant en tscherts fatgs.

RTR actualitad 08:00

Artitgels legids il pli savens

Scrollar a sanestra Scrollar a dretga