A la fin han sulettamain trais vuschs fatg la differenza. 20 delegadas e delegads èn stads il glindesdi saira per la libertad da votar, 17 èn stads per in Na a la refurma e sulettamain 6 per in Gea.
Sco il president da la PCD Grischuna, Kevin Brunold, ha ditg envers RTR, mussia questa votaziun er la malcuntentientscha cun la proposta da proporz ch’è uss sin maisa e vegn era il zercladur a l'urna. Quest model na cuntegna naginas da las pretensiuns da la PCD.
La partida sappia dentant era, ch’il chantun stoppia tar in Na a la refurma stgaffir ina schliaziun provisorica per las proximas elecziuns. Quest scenari veglian ins dentant evitar, uschia ch'ins saja a la fin vegnì tar la decisiun da dar liber la vusch per la votaziun dals 13 da zercladur.
Nus dain liber la vusch cun in ferm accent Na
Cunter la «chatscha etica», per abolir las contribuziuns da maternitad
Pli cleras èn stadas las decisiuns per las ulteriuras parolas. In cler Gea hai dà per abolir las contribuziuns da maternitad, in cler Na a l'iniziativa per ina chatscha etica che sa cumporta cun la natira. Quellas decisiuns èn vegnidas prendidas da la suprastanza da la partida.
Er da la suprastanza è vegnida la decisiun davart la lescha da Covid-19 e la lescha per cumbatter il terrorissem – omaduas giadas in Gea.
Las duas iniziativas agraras n'han gì nagina schanza tar la radunanza da delegads e delegadas. Omaduas vegnan refusadas. La lescha da CO2 ha percunter survegnì il sustegn da la delegada.
Sin in clic tut las fatschentas federalas, chantunalas e communalas: rtr.ch/votaziuns
