Ils helicopters da la Rega èn stads l'onn passà uschè bleras giadas en l'aria sco anc mai. La centrala d'acziun da la Rega ha organisà il 2020 en total 13'253 acziuns cun helicopters, 8% dapli che l'onn avant, communitgescha la Rega. En total ha la Rega organisà 16'273 acziuns.
S'augmentads èn tant ils sgols al lieu d'accident (+5,6%), sco er il dumber da sgols per transferir pazientas u pazients d'in ospital en l'auter (+9,8%). Ma las cifras da l'onn 2020 reflecteschian er las cundiziuns d'aura durant la stad e l'atun sco er il sa cuntegnair da Svizras e Svizzers en lur temp liber.
En Grischun è la Rega stada en acziun en media 4 giadas a di. Quai è pli u main tant sco l'onn avant. Concret munta quai 1'500 giadas – pia ca. 100 giadas dapli che l'onn avant.
Pli paucas repatriaziuns
Perquai ch'igl è vegnì viagià bler pli pauc entras la pandemia, ha la Rega er gì da repatriar pli pauca glieud durant il 2020. 758 pazientas e pazients èn vegnids repatriads (-43,6%), 647 èn vegnids transportads cun in dals trais jets da la Rega (-33,4%) e 111 cun sgols regulars (-70,2%). Malgrà che la Rega è sgulada pli paucs sgols, è il dumber d'uras en l'aria pli aut. Raschun è ch'ins saja sgulà pli savens en pajais ch'èn lunsch davent.
L'onn passà ha la Rega er survegnì 73'000 novas fauturas e novs fauturs. Da nov tegnan pia passa 3,6 milliuns fauturas e fauturs en l'aria la Rega cun lur contribuziuns.
Transportà 456 pazients da Covid-19
Total ha la Rega transportà enfin la fin da l'onn passà 456 pazientas e pazients da corona en lur aviuns e helicopters. 316 persunas èn vegnidas transportadas cun l'helicopter, 140 cun in jet d'ambulanza.
Plinavant ha la Rega er surpiglià differentas incumbensas supplementaras durant la pandemia. La Rega sustegnia la Confederaziun, ils chantuns e la populaziun cun ses know-how e sia infrastructura. Tranter auter coordinescha la centrala da la Rega sin dumonda da la Confederaziun quant plainas che las staziuns intensivas èn e sustegna uschia ils ospitals svizzers.
