Per reducir il consum d'energia dovri tenor la regenza grischuna ulteriurs sforzs. A questa conclusiun vegn la regenza sin basa dal rapport tar il concept d'energia chantunal. Quel mussa bain ch'il consum d'energia per persuna è resta stabil ils ultims onns en il chantun. Quel schai dentant sur la media svizra.
Motiv per questa tendenza saja tranter auter la topografia dal chantun. In bajetg en l'Engiadin'Ota dovria per exempel radund dubel uschè bler energia sco per exempel in bajetg en la Val dal Rain. Plinavant chaschunia er la branscha da turissem (pendicularas, l'infrastructura correspundenta, hotels) in pli aut consum ch'en auters chantuns.
Dapli sforz per realisar finamiras
Plinavant mussa il rapport che las mesiras realisadas ils davos onns, na tanschan betg per cuntanscher las finamiras da la lescha d'energia grischuna per l'onn 2020. Oravant tut la finamira da reducziun, che vegn definida per la pli gronda part da la rata da las sanaziuns energeticas dals edifizis existents, na vegnia probabel betg cuntanschida.
Ed era per realisar la strategia d'energia federala 2050 sto il Grischun adattar sia lescha d'energia scriva la regenza.
RR novitads 12:00
