Siglir tar il cuntegn

Header

video
Update da la regenza grischuna davart il coronavirus
Or da Telesguard dals 07.04.2020.
laschar ir
cuntegn

Regenza grischuna ha infurmà Cifra d'infectads sa stabilisescha plaunet

La cifra d'infectads cun il coronaviurs en il Grischun sa stabilisescha plaunet. Vul dir: I na dat betg pli tantas infecziuns novas mintga di. Quai ha il minister da sanadad Peter Peyer communitgà. Tenor la regenza è quai in cler segn che las restricziuns en il mintgadi portian fritg.

Il Grischun saja bain preparà e sin buna via, uschia Peter Peyer. Ils pli blers cas dettia actualmain anc adina en l'Engiadin'ota, il Puschlav ed il Mesauc. Ma era là giaja il dumber d'infecziuns novas enavos sco en l'entir chantun.

Christian Rathgeb punctuescha che «social distancing» saja vinavant fitg impurtant. Las autoritads sajan mintga di en contact cun il stab da crisa da la Mesolcina ed autras regiuns.

La situaziun en bus e tren

Il traffic funcziuna fitg bain, uschia ha declerà Mario Cavigelli, il manader dal Departament d'infrastructura, energia e mobilitad. Il persunal dal traffic public vegnia schanegià tras adattaziuns da l'urari. La purschida dal traffic public è organisada uschia ch'il «social distancing» possia vegnir respectà. Il traffic sur ils cunfins è limità, il traffic public parzialmain stritgà.

Las lavurs sin plazzals duain cumenzar sco planisà suenter Pasca – quai cun controllas d'igiena e distanza, uschia Cavigelli.

Indemnisaziuns finanzialas

Numerusas annunzias per indemnisar la perdita da gudogn vegnan elavuradas, ha ditg Marcus Caduff, il minister d'economia. El supplitgescha d'avair pazienza. Actualmain hajan circa 1'600 fatschentas dumandà per in credit. Sper quai hajan passà 5'000 firmas annunzià lavur curta. Er là saja il chantun vidlonder d'elavurar las dumondas uschè svelt sco pussibel.
Las canortas d'uffants hajan actualmain in'occupaziun fitg reducida, la regenza saja dentant vidlonder da chattar soluziuns.

Ils cas da corona en ils ospitals grischuns

En l'Ospital chantunal a Cuira vegnian tgiradas il mument 22 persunas cun Covid-19, otg da quellas sajan vid apparats da respirar, uschia il minister da sanadad Peter Peyer. En l'ospital a Samedan sajan nov pazientas e pazients en tractament, ina persuna vegnia respirada. En l'ospital a Poschiavo sajan quai sis persunas, en il rest dal chantun anc trais. Sche las mesiras vegnian vinavant respectadas, lura vegnian ils ospitals a dumagnar la situaziun, uschia Peyer vinavant.

Las scolas funcziunan er sin distanza

Scolastas e scolasts hajan lavurà intensivamain vid metodas dad instrucziuns a distanza, ha declerà Jon Domenic Parolini, manader dal Departament chantunal d'educaziun. Metodas e manieras da scolaziun vegnian evaluadas e barattadas tranter la magistraglia. L'onn da scola 2019/20 quintia sco onn da scola regular. Er duain las vacanzas esser sco planisadas.

RTR novitads 12:00