Siglir tar il cuntegn

Header

Scolar vid in computer.
Legenda: L'onn da scola current duai valair sco onn da scola regular, quai malgrà che l'instrucziun ha actualmain lieu sin distanza. Keystone
cuntegn

Malgrà distance learning 2019/20 vala sco onn da scola regular

En tut ils chantuns vala l'onn da scola 2019/2020 sco onn da scola cumplain e regular. Quai ha decis la Conferenza svizra dals directurs da l'educaziun e duai valair independent da l'instrucziun actuala sin distanza e dad ulteriuras eventualas decisiuns dal Cussegl federal.

Il temp da scola da l'onn scolastic current na vegn pia betg prolungà ed er ils chalenders chantunals valan vinavant. Plinavant na vegn betg fatg scola durant las vacanzas, communitgescha la Conferenza dals directurs d'educaziun.

La fin da quest onn da scola survegnan tut ils scolars e las scolaras in attestat. En quel vegn remartgà ch'igl ha dà instrucziun a chasa durant la pandemia da corona. Per la midada da la scola primara sin il stgalim superiur e dal stgalim superiur en ina scola cuntinuanta duain ils chantuns fin la fin d'avrigl elavurar reglas adattadas.

Diploms èn garantids

Scolars e scolaras da l'ultim onn dal gimnasi, da scolas medias spezialisadas, da la maturitad professiunala u er students e studentas da scolaziun da maturitad da passarella duain survegnir lur attestads a temp. Uschia duai esser garantì ch'els pon cuntinuar l'atun 2020 cun ina scolaziun pli auta ubain surpigliar ina plazza da lavur.

Sin basa da tge ch'ils attestats vegnan fatgs, vegn decidì il pli tard l'entschatta matg. Il proceder per la finiziun dals emprendissadis vegn tenor la Conferenza da directurs d'educaziun sclerì communablamain cun la Confederaziun ed ils partenaris socials.

Artitgels legids il pli savens

Scrollar a sanestra Scrollar a dretga