La gronda finamira dal chantun saja da dumagnar la cifra da reproducziun sut 1. Uschia dastgass la gastronomia laschar avert enfin las 23:00. Sbassar questa valur giaja dentant betg uschè svelt, manegia Peter Peyer. I saja perquai tant pli impurtant da restrenscher contacts, laschar testar e rumper las chadainas d'infecziun. Per la gastronomia fissi da gronda impurtanza da nizzegiar il temp dals dis da festa e schaner e far svieuta.
Mesiras sin donn e cust da la gastronomia
Las novas reglas per la branscha da gastronomia sajan rigurusas e fetschien grond donn. Gist ils dis da festa sajan da gronda impurtanza per manaschis grischuns. Quai fiss il temp da far reservas, uschia commentescha il minister d'economia Marcus Caduff las novas decisiuns da la Confederaziun. El spetgia uss che la Confederaziun indemniseschia las perditas da la branscha. Caduff è plinavant da l'avis ch'il chantun haja fatg ses pensum da chasa cun ordinar l'emna passada novas reglas e serrar la gastronomia e lieus da temp liber per duas emnas. Perquai saja uss er la Confederaziun en l'obligaziun da dar agid finanzial. Er per Caduff èsi cler che la finamira gronda dal chantun saja da sbassar las cifras uschia ch'ustarias, bars etc. dastgan avair avert enfin las 23:00. Per uschia almain minimar in zic il donn economic per la branscha.
