Las pli impurtantas infurmaziuns:
- Examens da maturitad a scrit han lieu; quels a bucca betg.
- La scolas popularas cumenzan cun l'instrucziun da preschientscha ils 11 da matg.
- Sch'i dat examens a bucca en scolas medias spezialisadas n'è anc betg decis.
- La regenza deplorescha ch'i na dat anc nagina decisiun per las pendicularas.
Sin basa da la decisiun da la Confederaziun da mesemna ha la regenza grischuna decis ch'i dettia quest onn be examens da maturitad en scrit en ils gimnasis grischuns. D'examens a bucca vegnia desistì, uschia ha declerà il minister d'educaziun Jon Domenic Parolini. Ils emprims examens en scrit datti a partir dals 11 da matg.
Vinavant instrucziun a distanza per ulteriuras classas da gimnasi
Per las scolaras ed ils scolars dal gimnasi e dal gimnasi inferiur dura la situaziun extraordinaria anc fin ils 8 da zercladur 2020. Per els datti vinavant in'instrucziun a distanza. Las scolas medias privatas pon – sin dumonda – cumenzar cun l'instrucziun da preschientscha en il gimnasi inferiur a partir dals 11 da matg 2020.
Vinavant dettia midadas tar la promoziun en las scolas medias. Quai ha ditg il manader da l'Uffizi per furmaziun media-superiura Hans Peter Märchy. Dad ina vart possian tut las scolaras e scolars far ils examens finals. Da l'autra vart, en las classas inferiuras, saja garantì ch'ils scolars possian ir en la proxima classa. I dettia bain attestats, quels na vegnan dentant betg valitads per la promoziun.
Scolas medias spezialisadas (FMS)
A las scolas medias spezialisadas vegnan fatgs ils examens finals en scrit. Sch'era ils examens finals ston vegnir vegnir fatgs a bucca, dependa d'in conclus anc pendent da la Conferenza svizra dals directurs chantunals d'educaziun publica.
Maturitad professiunala
La maturitad professiunala federala obtegnan ins l'onn 2020 mo sin basa da las notas empiricas. Il chantun Grischun vegn a realisar las prescripziuns da la Confederaziun.
Scolas obligatoricas
En las scolas obligatoricas duai puspè avair lieu – sche pussaivel – l'instrucziun da preschientscha tenor l'urari regular a partir dals 11 da matg 2020. Damaun infurmescha il Departament d'educaziun, cultura e protecziun da l'ambient las scolas davart las prescripziuns generalas sco er davart ils agids da planisaziun per realisar las mesiras da protecziun necessarias. Sin basa da las prescripziuns generalas pon las scolas adattar lur manaschi da scola a las relaziuns localas (situaziun da spazi, transport da scolaras e scolars etc.).
Tenor l'Uffizi federal da sanadad BAG giogan ils uffants mo ina pitschna rolla cur derasar il virus. Tranter auter pervia da quai duessan surtut scolaras e scolars pli giuvens pudair sa deportar uschè normal sco pussaivel. Tenor Jon Domenic Parolini na sajan, sa basond sin ils principis dal BAG, naginas reglas da distanza necessarias.
Mesiras da protecziun en canortas d'uffants ed en gruppas da gieu
Las purschidas da la tgira d'uffants cumplementara a la famiglia pon puspè avrir lur manaschi a partir dals 11 da matg 2020. Quai cun resguardar ils concepts da protecziun. Per las canortas d'uffants stattan a disposiziun agids finanzials extraordinaris dal chantun e da las vischnancas. Las gruppas da gieu ch'èn stadas serradas durant las ultimas emnas, pon medemamain puspè avrir lur manaschi a partir dals 11 da matg 2020.
Pass da schluccada impurtants per la societad e per l'economia
La regenza grischuna beneventa ils pass da schluccada a partir dals 11 da matg che la Confederaziun ha decis ier. I sa tractia da pass impurtants per normalisar la societad e l’economia. Particularmain l'avertura da la gastronomia è in pass impurtant per turnar a la normalitad.
Deplorà vegnia che las pendicularas n'han anc adina betg la segirezza da planisaziun per la proxima stagiun da stad.
Abitaziuns secundaras
Sin basa da las schluccadas ha la Regenza er abolì l'obligaziun d'annunzia per possessuras e possessurs d'abitaziuns secundaras.
