Il Cussegl grond ha approvà il mardi en damaun il quint chantunal 2020 - e quai unanimamain. Il quint da l'onn passà ha serrà cun in gudogn da passa 80 milliuns francs e quai malgrà che la pandemia da corona ha custà al chantun netto radund 60 milliuns francs e malgrà ch'il chantun aveva quintà cun in minus da passa 30 milliuns francs.
Discussiuns hai dentant dà en la debatta d'entrada. Ils socialdemocrats nizzegiassan gugent la buna situaziun finanziala per investir per exempel en canortas ubain en forza solara.
La vart burgaisa ha dentant franà la PS. Per l'ina na saja la pandemia anc betg passada. Quella chaschunia anc adina custs. E per l'autra saja – tenor prognosas – da far quint che las entradas dal chantun sa sbassian en futur. Perquai saja en l'interess da tuts mantegnair las finanzas chantunalas sin in nivel gulivà, han argumentà ils burgais.
