Siglir tar il cuntegn
cuntegn

Chantun Sessiun dal favrer è istorgia

La revisiun parziala da la lescha da taglia è suttetg e tut las dumondas ed incumbensas ch'eran previsas èn vegnidas tractadas. Cuzzà ha la sessiun bun in mez di pli pauc che quintà.

Legenda: Tadlar il audio Mezdi: La sessiun dal Cussegl grond è a fin. Durada 02:42 minutas.
02:42 min, Actualitad dals 13.02.2019.

Suenter strusch dus dis è la sessiun ch'ha cumenzà il glindesdi suentermezdi gia a fin. La revisiun parziala da la lescha da taglia è sut tetg e numerusas dumondas ed incumbensas èn vegnidas tractadas.

Uschia ha il Cussegl grond pudì serrar las portas gia avant las 10:30 la mesemna a bun'ura. E tuttina, hai er dà temas ch'han procurà per discussiuns tar ils parlamentaris. Il mardi saira ha il Cussegl grond numnadamain gia serrà las portas curt suenter las 16:30 – per lura pudair cuntinuar oz a las 08:15.

Radund 40'000 francs per bun duas uras

Tar la dumonda sche quai saja stà necessari u betg van las opiniuns dapart. Tina Gartmann, la presidenta dal Cussegl grond è persvasa ch'igl è stà la dretga decisiun da spustar sin oz la discussiun e na betg far ella be a la sperta la saira. En la medema crenna dattan er Vera Stiffler, presidenta da la fracziun da la PLD, Remo Cavegn, president da fracziun da la PCD e Conradin Caviezel president da fracziun da la PS. Er els èn da l'avis ch'igl è impurtant da dar temp e plaz a la discussiun. Sper quai sajan vegnidas introducidas bleras dumondas ed incumbensas durant questa sessiun e quai dettia lura pendenzas. E vitiers vegnia er anc che la sessiun da l'avrigl saja gia stritgada, e quai spargnia anc ina giada custs.

Quels arguments vesa er Gian Michael president da la fracziun da la PBD. El è dentant er da l'avis ch'ins avess pudì decider auter, er en vista als custs. Radund 40'000 francs han las bun duas uras dad oz a bun'ura numnadamain custà, quai tenor il secretariat dal Cussegl grond. Ed er Jan Koch, president da la fracziun da la PPS metta en dumonda l'effizienza ed er ils custs. Ins avess tenor el senz'auter pudì prolungar la discussiun il mardi saira.

La sessiun da l'avrigl croda, quai era gia vegnì decidì l'onn passà. La proxima sessiun è lura la sessiun extra muros a Puntraschigna il zercladur.

RR actualitad 12:00