Il desideri d'ir giuadora suenter passa dus mais «lockdown» è stà grond. En tut ils trais «hotspots grischuns» che nus avain visità hai gì pulit blera glieud sur la fin d'emna d'Ascensiun. Ins po uschia bain discurrer d'ina tscherta «stancladad da corona». Cunzunt giuadora en la natira pari che la maioritad è sa tegnida vid las reglas da distanza.
L'ABC dal cumbat cunter il coronavirus è en ils chaus e vegn (cun excepziuns) là era vivì cun las emprimas grondas schluccadas. Auter en il «Fashion Outlet» a Landquart, nua ch'ils responsabels ston adina puspè far attent ils consuments sin las reglas existentas.
Blera glieud al Lag la Cresta...
Gievgia e venderdi han mintgamai tranter 300-400 persunas fatg in paus dad ina spassegiada a la riva u èn schizunt siglids en il lai. Sonda era quai in zic pli paucs, cunquai che l'aura n'ha betg giugà cun. Schegea che pli e pli blers vegnan sper il lai, possian ins respectar pulit bain las mesiras pretendidas da l'Uffizi federal da sanadad:
La glieud vul uss ir giuadora ed jau sun stà surstà quant disciplinads ch'ils giasts èn stads. Ins ha propi prendì resguard in sin l'auter e tegnì distanza.
...fitg blera glieud en il «Fashion Outlet» a Landquart...
Auter vesa quai ora a Landqaurt en il grond center da cumpra. Il «Fashion Outlet» era gia l'avantmezdi d'Ascensiun pulit emplenì. Avant ils gronds shops da Nike u Puma steva la glieud en colonna. Malgrà blers tatgaders e placats cun indicaziuns che faschevan attent, la distanza pretendida da dus meters vegniva ignorada da bain inqual persuna.
Nus stuain cumbatter relativ fitg per che nus vegnin da respectar las reglas dal BAG en il center da cumprar en.
... glieud enturn ils lais da l'Engiadin'Ota
En l'Engiadin'Ota n'avevi d'Ascensiun anc betg fullas enturn ils lais. Tuttina èn bain insaquants sa rendids per ina spassegiada enturn il Lai da San Murezzan ed uschia giudair la fina bell'aura.
Per nus hai qua pauca glieud. Giu tar nus han ins en tscherts lieus gia puspè stuì serrar plazs, perquai che fullas eran là, uschia ch'igl è qua per nus in zic sc'in paradis.
En la Svizra èn las cifras da cas per il mument fitg bassas, uschia che jau stun fitg patgific. Natiralmain èn ins uss dentant trenà e guarda da sa tegnair vid las reglas da distanza.
Jau sun fitg precauta e vom ord via a la glieud. Qua prenda la glieud era pli fitg resguard che tar nus giu en la Bassa.
