Siglir tar il cuntegn

Header

Purtret d'in pop che vegn gist tratgs en.
Legenda: Keystone
cuntegn

Statistica da populaziun 2019 12% damain naschientschas ma er damain mortoris

En il Grischun hai dà l’onn passà damain naschientschas – dentant er damain mortoris ch’en cumparegliaziun cun il 2018. Quai mussan las novas cifras dal Uffizi federal da statistica.

L'onn passà èn naschids 1'630 pops e poppas en il Grischun, quai èn 12% pli paucs ch'il 2018. Total hai dà 816 buobs ed 814 mattatschas. Er il dumber da persunas ch'èn mortas è sa reducì sin 1'748. Il Grischun è in dals sulets chantuns en Svizra nua che dapli persunas moran che quai ch'i dat pops.

Vis numnadamain sin l'entira Svizra datti bain anc dapli naschientschas che mortoris, dentant er qua s'avischinan las cifras adina pli fitg ina a l'autra. Fertant ch'il dumber da pops e poppas è sa reducì per 2% hai dà 1% dapli mortoris. L'onn passà èn naschids 18'400 pops dapli che quai che persunas en mortas, uschia che la populaziun svizra è anc adina vid crescher.

Pli paucas maridaglias e partenadis registrads

Il 2019 hai dà en Svizra 39'000 maridaglias, quai èn 4,3% pli pauc che l'onn avant. Tar ils partenaris registrads datti dapi il 2010 adina enturn 700. Er l'onn passà hai dà cnap 700 partenadis registrads, quai èn 3,7% pli pauc. Qua è il dumber ì enavos pli ferm tar ils partenadis tranter dunnas (-7,3%) che tar ils umens (-1,4%).

Dapli divorzis ma pli paucs partenadis schliads

Il 2019 hai dà 16'900 divorzis, quai èn 2,1% dapli che l'onn avant. Sch'il trend cuntinuescha èsi dad ir da quai anora che duas da tschintg letgs pudessan finir en in divorzi.

Dals partenadis registrads èn 200 puspè vegnids spartids. Quai èn 2,9% dapli che l'onn avant. Malgrà ch'il dumber è sa reducì pli ferm tar ils umens che tar las dunnas (-3,6% cumpareglià cun -1,5%), hai dà tar ils umens pli savens spartidas.

Ord l'archiv:

video
En duas fin la fin
Or da Cuntrasts dals 26.02.2020.
laschar ir

RTR novitads 12:00

Artitgels legids il pli savens

Scrollar a sanestra Scrollar a dretga