Siglir tar il cuntegn

Header

audio
Tgi succeda a Stefan Engler?
Or da Actualitad dals 17.07.2020.
laschar ir. Durada: 04:47 minutas.
cuntegn

Tgi succeda a Stefan Engler? Ina persuna giuvna duai surpigliar presidi da la PCD Grischuna

La glista da pussibels candidats per il presidi da la PCD è lunga. Per Martin Candinas, Tino Schneider e Carmelia Maissen na vegn quest post betg en dumonda. Per Livio Zanetti, Reto Crameri ed Alessandro Della Vedova percunter schon.

Per Martin Candinas èsi fitg cler, ch’el na vul betg surpigliar il post da Stefan Engler. El saja per ina gia en la suprastanza da la PCD svizra e per l’autra è el da l’opiniun, che la presidenta u il president da la PCD grischuna duai esser politicamain activ en il Grischun, pia en il Cussegl grond .

Nus avain en la PCD in entir catalog da candidatas e candidats per quest post.
Autur: Martin CandinasCusseglier naziunal

Era Carmelia Maissen e Tino Schneider din da na

Era la presidenta da la vischnanca Ilanz/Glion, Carmelia Maissen, desista d’ina candidatura. Ella haja blera lavur cun sia incumbensa sco presidenta communala ed haja betg temp da surpigliar il presidi da la PCD grischuna.

Il presidi da la vischnanca Ilanz/Glion dumonda tut mia energia ed attenziun.
Autur: Carmelia MaissenDeputada e presidenta da la vischnanca Ilanz/Glion

I fiss in’interessanta incumbensa da manar ina partida, ma il mument vegnia quai betg en dumonda. Il medem di era il giuven Tino Schneider, ch’è commember dal presidi da la giuvna PCD svizra. Schneider ha surpiglià l’emprim da fanadur il timun dal club da ballape da Cuira (Cuira97), uschia na possia el betg anc surpigliar il presidi da la PCD grischuna, ha el detg sin dumonda. Uschiglio fiss el stà interessà ed avess era las abilitads per questa lavur.

Livio Zanetti, Reto Crameri ed Alessandro Della Vedova na sclaudan betg

Interess per il presidi da la PCD grischuna mussa Alessandro Della Vedova. Ses temp sco president dal Cussegl grond è l’avust a fin ed el avessi lura temp, di l’anteriur president communal dal Puschlav. Era Livio Zanetti na sclauda betg ina candidatura. Ussa stoppia el anc discurrer cun la famiglia, cun diversas persunas da la partida e lura ponderar, sch’el vegli star a disposiziun.

Cunquai ch’jau stoss chalar mia lavur en la suprastanza da Landquart pervia da la limitaziun da temp d’uffizi, fiss quai senz’auter in’interessanta opziun.
Autur: Livio Zanettideputà e secretari PCD

Vi da ponderar davart ina candidatura è era Reto Crameri. El ha gist finì la scola d’agricultura e fatg l’examen da notariat. Uss avessi el puspè temp. El stoppia dentant ponderar, sch’el veglia gest puspè planisar quest temp.

Decisiun ils 02-09-2020

L’elecziun dal nov president da la PCD grischuna è ils 2 da settember a la radunanza da delegads. Reto Crameri, responsabel per las medias tar la partida, quinta dentant ch’ils nums da las candidatas ed ils candidats sajan enconuschent il cumenzament d’avust.

RTR actualitad 12:00