Per la perioda da taglia 2005 haja la Dretgira administrativa dal Grischun fixà cun raschun l'entrada suttamessa a la taglia sin la summa da 105 milliuns francs. Quai ha decidì il Tribunal federal. Stoffel aveva inditgà en sia decleranza da taglia in'entrada ed ina facultad da 0.- francs.
Sin totalmain 114 paginas ha la Dretgira administrativa dal Grischun demussà en sia sentenzia dal december 2019, cun tge trics da contabilitad irritants da Remo Stoffel ch'igl è vegnì fatg pajaments. Il Tribunal federal vegn medemamain a la conclusiun d'entrada suttamessa a la taglia da 105 milliuns francs. Sulet tar la facultad han ils derschaders da Losanna approvà per part il recurs da Remo Stoffel. Uschia resulta anc ina facultad suttamessa a la taglia da 98 milliuns francs.
Il gieu da la summa 0 ha Stoffel inscenà ensemen cun ulteriuras persunas e firmas per optimar la taglia en connex cun cumprar aczias da la Avireal SA ord l'ierta da la SAir-Group entras la Ability SA.
