Siglir tar il cuntegn

Header

cuntegn

UBI approvescha recurs Film documentar davart Quadroni ha violà principi d'objectivitad

Il film documentar davart il whistleblower Adam Quadroni che SRF ha mussà, haja cuntrafatg al principi d'objectivitad. Quai ha decidì l'Instanza independenta da recurs da radio e televisiun, UBI. Il president da la dretgira regiunala na saja betg vegnì purtretà cun la diligenza necessaria.

Adam Quadroni è la figura principala dal film documentar che SRF ha mussà ils 4 da december 2019 sco DOK. El ha infurmà la Cumissiun da concurrenza WEKO davart il cartel da construcziun en il Grischun. Il film cun il titel «Der Preis der Aufrichtigkeit – Adam Quadronis Leben nach dem Baukartell» tracta oravant tut las consequenzas sin la vita persunala da Quadroni.

Betg abel da furmar atgna opiniun dal derschader

En la reclamaziun vegn crititgà surtut, co ch'il president da la dretgira regiunala vegnia purtretà. El vegnia numnà ed er mussà pliras giadas en il film ed ad el fetschian diversas persunas renfatschas severas. Tar ina tala constellaziun dettia in'obligaziun da diligenza speziala per ils schurnalists. En sia discussiun saja l'UBI la finala vegnida a la conclusiun che quella na saja betg vegnida resguardada en quest cas. Il public n'haja betg pudì furmar in'atgna opiniun davart il president da la dretgira regiunala che vegn crititgà.

Decisiun stretga

Er sch'i giaja en il center dal film per Adam Quadroni e ses destin, sa tractia tar ils puncts manglus betg be da puncts laterals, ord vista giuridica. En la votaziun ha l'instanza independenta approvà cnap la decisiun, quai cun 4 cunter 3 vuschs.

Preistorgia

Textbox aufklappenTextbox zuklappen

Il film DOK da SRF è vegnì emess ils 4 da december 2019 ed ha dà da discutar, cunzunt en Engiadina. Sinaquai ha il giurist engiadinais Not Carl reclamà tar il post da mediaziun da la SRG SSR. En trais da set reclamaziuns ha il mediatur Roger Blum, che n'è entant betg pli en uffizi, dà raschun a Carl. Tenor Blum sa tractava dentant da «puncts da detagls».

Not Carl n'ha betg stà cuntent cun il parairi ed ha tratg vinavant il cas a la proxima instanza – la Instanza independenta da recurs da radio e televisiun (UBI), ch'ha uss decis en favur da Carl. La UBI è ina cumissiun da la Confederaziun ordaifer il parlament. Las decisiuns che la UBI prenda pon vegnir tratgas avant il Tribunal federal.

RTR novitads 20:00

Artitgels legids il pli savens

Scrollar a sanestra Scrollar a dretga