En connex cun las cunvegnas da pretsch en la branscha da construcziun ha la WEKO sentenzià set interpresas a chastis finanzials. Perquai che la Societad grischuna dals impressaris constructurs ha dentant organisà las presesidas, durant quellas che tschertas manipulaziuns da la concurrenza èn vegnidas sentenziadas, sto er ella sa participar als custs dal proceder.
Tenor la communicaziun da medias haja la Societad grischuna dals impressaris però mo ademplì sias obligaziuns cun organisar talas sesidas. Pertge il reglament da la Societad svizra d'impressaris dal 2003 prevesia explicit talas presesidas. E quest reglament haja la WEKO giuditgà sco «nunproblematic». «I na dettia nagins indizis per eventualas limitaziuns da la concurrenza pli». Sche la WEKO midia lur tenuta tar il reglament dal 2003 e renfatschia a la Societad mo l'organisaziun da talas presesidas, lura na saja quai betg chapibel.
Memia «da buna fai»
Quai ch'ins possia dentant renfatschar a la societad saja ch'ella saja stada memia pauc critica. Cunquai che cunvegnas sajan, sa chapescha da sasez, lura sco er uss stadas scumandadas n'haja la societad pensà che ses commembers na cuntrafetschian betg al reglament.
Oz pon ins renfatschar a nus che l'uniun è stada memia da buna fai avant 10-14 onns perquai ch'ins è sa fidà ch'ils reglaments vegnan resguardads a moda confurma.
Suenter quai ch'ins sappia ozendi, avessan ins forsa stuì agir pli critic. En futur stoppian ins natiral sensibilisar ils commembers anc pli fitg davart lur dretgs da concurrenza e dad agir pli precaut.
Betg stads activs
Che la societad saja stada preschenta durant las presesidas na constettia dentant betg. Ella haja mo organisà ellas. Quai confermia er il rapport da la WEKO. Quai mussia ch'ils artitgels da «Republik» sajan «fake news».
RR novitads 11:30
