Maletgs sco quels da la citad da Turitg n'hai betg dà en il Grischun. Ma er qua ha inqual via e senda stuì vegnir serrada ord motivs da segirezza, cunzunt en Surselva e per il Mesauc hai dà gronds quantums aua. Donns pli gronds n'hai dentant betg dà.
Pumpiers en Grischun èn pronts
Er ils pumpiers grischuns èn pronts en cas ch'i dat situaziuns precaras, quai ha Conradin Caduff, l’inspectur dals pumpiers grischuns, ditg envers RTR. En general manegia el ch'i dettia singuls lieus ch'ins stoppia observar meglier u er in u l'auter aual che giaja sur la riva or. Cun problems pli gronds fa Caduff dentant betg quint.
En la vischnanca da Mustér per exempel è inqual aual ì sur la riva, la situaziun vegnia perquai observada, ha declerà Simon Cathomen, il cussegliader local da privels da natiras.
La plievgia vegn oz e damaun
Cun plievgia pli intensiva spetga il Grischun oz e damaun. Durant l'entira gievgia èsi da spetgar cun urizis locals e plievgia intensiva. Cunzunt en il Nord dal chantun è spezial en Surselva crescha il privel da sbuvaditschs locals. Il venderdi fai alura aura variabla. Per part èsi da quintar cun urizis ed uradis.
En il decurs da la fin d'emna sa calma la situaziun alura adina pli fitg - la sonda datti surtut en il nord anc blers nivels ed i è surtratg. Localmain plovi.
