Tar las elecziuns da la regenza dals 10 da zercladur èsi necessari da dumbrar anc ina giada las vuschs. La differenza tranter ils candidats Jon Domenic Parolini (PBD) e Walter Schlegel (PPS) è stada uschè pitschna che la lescha davart ils dretgs politics en il Grischun pretenda ina nova dumbraziun da las vuschs.
Cunquai che Jon Domenic Parolini ha survegnì 15'904 vuschs e Walter Schlegel 15'836 vuschs è la differenza da vuschs stada 68 – quai ch'è cler sut la limita da 0,3%. Era sin basa dals protocols che las vischnancas han gì da trametter a la chanzlia statala, è la differenza restada sut questa limita.
Controllar tut ils cedels – dumbrar mo vuschs dals 2 candidats
Mesemna suentermezdi cumenzan las radund 25 persunas a dumbrar tut ils cedels da votaziun. Controllads vegnan tuts, era quels declerads nunvalaivel. Silsuenter vegn dumbrà las vuschs – però mo questas da Jon Domenic Parolini e da Walter Schlegel.
L'emprima giada da dumbrar suenter ina elecziun
Ils candidats dastgan – sch'i vulan – assister a la dumbraziun. Cura che la dumbraziun vegn ad esser finida, n'è anc betg cler, cunquai ch'igl è l'emprima giada en il Grischun ch'igl è da dumbrar anc ina giada ils cedels suenter ina elecziun. La chanzlia statala na quinta betg da pudair publitgar ils resultats definitivs avant venderdi.
RR novitads 10:00
Pli cler e pli stgarsa che la differenza da vuschs è