A partir da l’autra gievgia (22-04) possian alura er las ultimas duas gruppas, las persunas tranter 25 e 34 onns e las persunas da 16 fin 24 onns, s'annunziar per la vaccinaziun en il Grischun.
Fin uss sajan gia radund 50'000 persunas s’annunziadas per la vaccinaziun cunter Covid-19. Da quellas èn 20'000 immunisadas cumplettamain e 30'000 han survegnì l'emprima dosa dal vaccin. Mintga di vegnian vaccinadas radund 1’300 persunas en ils nov centers da vaccinaziun en il Grischun. Persunas cun grevas malsognas cronicas preexistentas e persunas da 75 onns e dapli han vinavant l'access prioritar a la vaccinaziun.
Prioritad tenor l'entrada da l'annunzia
Er sch'igl è uss per ulteriuras gruppas da vegliadetgna liber da sa preannunziar, possia anc adina ir fin dus mais e mez davent da l'annunzia fin al termin da vaccinaziun, scriva il chantun. Entaifer las gruppas da vegliadetgna vegnan quests termins priorisads tenor l'entrada da las annunzias.
Adattà recumandaziuns per persunas ch'avevan Covid-19
Vitiers ha l'Uffizi federal da sanadad adattà las recumandaziun da vaccinaziun per persunas che han fatg tras Covid-19. Tenor las enconuschientschas las pli novas, recumonda il BAG da sa laschar vaccinar sis mais suenter in'infecziun cumprovada cun Covid-19 (PCR, test d'antigens).
