En il Grischun duain tut las persunas che vulan sa laschar vaccinar avair survegnì lur emprima vaccinaziun fin la fin zercladur. En il chantun vegnan per il mument bun 1'200 persunas a di vaccinadas. Las proximas emnas vegn quintà cun ina furniziun da 15'000 dosas. Enfin il zercladur 2021 vegnan 184'100 dosas furnidas. Uschia duajan tut quels che vulan laschar vaccinar survegnir lur emprim vaccin fin lura.
Jau sun fitg surpraisa, a moda positiva. Jau ma legrel che nus survegnin dapli dosas da vaccin. Jau na sai betg tge che la Confederaziun ha discurrì cun ils furniturs, para han ins pudì augmentar la furniziun. Las dosas da vaccin vegnan, ellas èn empermessas.
Plan adattà
Tenor il chantun vegn il plan da vaccinaziun d'enfin quà adattà. Il persunal da sanadad e persunas sur 45 onns pon s'annunziar a partir dad immediat per ina vaccinaziun. Ils termins na vegnan dentant betg dads enconuschent subit. I possia dar temp da spetga da fin a 2 mais e mez. E vinavant valia che persunas cun grevas malsognas cronicas e talas sur 75 onns vegnian priorisadas.
Priorisar tenor vegliadetgna è fair ed objectiv, la vegliadetgna reflectescha il risico d’in andament grev da la malsogna.
Dapli vaccin munta natiralmain era dapli lavur logistica. Il Grischun saja dentant preparà.
Nus restain tar 9 centers da vaccinaziun, dentant vegn la capacitad bajegiada ora. I vegn vaccinà 7 dis l’emna, era pli tard la saira per la populaziun che ha da lavurar. Nus essan preparads. Uschè spert sco il vaccin arriva cumenzain nus.