Quests effects secundars datti, tenor SwissMedic, il pli savens:
- Mal il bratsch: tar circa 80% da las persunas vaccinadas,
- Stancladad u mal il chau: tar la mesadad da las persunas vaccinadas,
- Mal ils musculs u las giugadiras: tar in terz da las persunas vaccinadas,
- Fevra: tar circa 10% da las persunas vaccinadas.
Per gronda part n'han ils effects nagin decurs gravant. Suenter dus fin trais dis laschian quels effects suenter. Durant las proximas duas fin trais emnas bajegia il sistem d'imunitad si ina protecziun cunter il coronavirus.
Tenor Christoph Küng, il responsabel per la sgürezza da medicamaints tar SwissMedic, haja fin uss dat nagins effects secundars ch'ins n'avess betg spetgà.
Grondas differenzas persunalas
Effects secundars sajan normal tar ina vaccinaziun. Quai ha ditg il immunolog e commember da la Taskforce scientifica da la Confederaziun, Christian Münz envers SRF. Quai sajan ina reacziun da defensiun dal corp.
Quant ferm che quellas èn, dependa dal sistem d’immunitad d'ina persuna. Quellas e quels ch'han schon fatg atras in'infecziun cun corona u quels ch'han schon survegnì ina dosa dal vaccin, reageschan per regla pli ferm. Lur corp enconuscha ils proteins ord il vaccin e reageschan perquai pli spert e pli ferm. Dunnas mussian er pli savens effects secundars. Tenor l'immunolog hajan dunnas en general il pli ferm sistem d’immunitad – perquai la reacziun pli ferm.
Sch'ils effects sa mussan pli ditg che 2-3 dis, recumonda il immunolog da consultar il medi.
