Las grondas uniuns da gastronomia, p.ex. GastroSuisse e GastroGrischun, han crititgà fermamain il plan da sortida dal Cussegl federal. Ins haja agì senza curaschi e betg pudì mussar si ina via co vinavant ad ustieras ed ustiers.
«Sfida existenziala per blers manaschis»
Ils manaschis da gastronomia na possedian en general betg uschè ina gronda liquiditad. Ins lavuria ella gastronomia en general cun pitschnas marschas. E schegea ch'ins na po betg avrir l'ustaria, sajan blers custs fixs tuttina qua. Quai mainia spert ad ina situaziun nua ch'in'ustaria ha il concurs che smanatscha.
Chapientscha per decisiun dal Cussegl federal
Il manader da l'institut da turissem e temp liber da la FHGR Andreas Deuber chapescha dentant la decisiun dal Cussegl federal. La regenza decidia durant il temp da la crisa da corona fitg sistematic. Ussa hajan ins en favur da la sanadad da la populaziun prendì quella decisiun e taxà ils facturs economics pli pauc.
