Siglir tar il cuntegn

Header

Sguard tras la Val Tamina cun il Calanda davosvart, suenter l'ultima navaglia entschatta december.
Legenda: Il meteorologs prognostitgeschan in pau naiv per Nadal. Sguard tras la Val Tamina cun il Calanda davosvart, suenter l'ultima navaglia entschatta december. Keystone
cuntegn

Vent, plievgia e naiv «Clera notg...» betg sch'i va tenor l'aura

La notg passada è stada burascusa en parts da la Svizra. En il chantun Turgovia hajan ins mesirà spertezzas da vent da bunamain 80 kilometers per ura. Ferms vents haja er dà en la Svizra franzosa ed en l’Argovia. Quai rapporta «Meteo-News». Er haja dà blera plievgia. Quai surtut en il chantun da Turitg: A Wädenswil haja dà passa 31 millimeters plievgia per meter quadrat

Nadal alv en grondas parts dal chantun

Vers gievgia saira surpiglia ina front d'aria fraida la controlla da l'aura. Quai ha dit Nicole Glaus dad SRF Meteo envers RTR. Quai munta che las temperaturas sa sbassan e cun ellas er il cunfin da naiv. En il nord da las alps (incl. nord dal Grischun) è quel al cumenzament anc tar 1'200 fin 1'500 meters, sa sbassa però durant la notg sin Nadal. En las regiuns pli pli bassas poi dar naiv fin a 600 meters sur mar. La pli blera naiv datti tenor Nicole Glaus en il Grischun dal Nord.

La temperatura maximala è enturn 10 grads ed igl è vinavant da quintar cun ferms vents. Ils 25 da december pudessi lura anc ina giada dar naiv. Da Son Steffan duessi lura puspè vegnir pli bel cun dapli sulegl.

In zic pli pauc grisch e bletsch èsi probabel en il sid da las alps, pia Engiadina e Tessin. Quai cunzunt en il decurs dal di e cun pulit ferm favugn dal nord encunter saira. Auter ch'èn il nord duessi ils proxims dis dar dapli sulegl be cun singulas fasas da nivels. La gronda naiv pudess qua vegnir pir l'emna proxima.

RTR novitads 09:00

Artitgels legids il pli savens

Scrollar a sanestra Scrollar a dretga