Per 25 vischnancas grischunas hai dà bunas novas en connex cun il scandal d'AutoDaPosta. Ellas survegnan enavos en tut 5,7 milliuns francs. La vischnanca che survegn il pli bler è Tavau cun passa 1,3 milliuns francs. Per il landamma Tarzisius Caviezel ina gronda surpraisa.
Nus fissan gnanc vegnì sin l'idea che l'AutoDaPosta SA savess cugliunar nus.
Sumegliant tuna quai er en la vischnanca vischinanta da Claustra-Serneus. Els hajan bain quintà ch'i vegnia enavos daners ma betg che quai saja gist ton, di il chanzlist da Claustra Michael Fischer. La vischnanca dastga selegrar da restituziuns da passa 1,2 milliuns francs.
La summa correspunda bunamain als custs annuals per noss bus local da Claustra.
Er vischnancas che survegnan enavos summas pli pitschnas èn cuntentas. Uschia per exempel la vischnanca da Lumnezia che survegn enavos bun 68'000 francs. Per il president communal Duri Blumenthal èsi dentant er logic ch'er la vischnanca da Lumnezia survegna insatge. Perquai sche tuts hajan pajà da memia sch'haja er lur vischnanca pajà memia bler. Ma il sentiment d'esser vegnì cugliunà saja betg bels.
Igl è in frust ch'ins na po betg pli fidar a concerns sco la Posta.
Malgrà la schletta experientscha va Duri Blumenthal da quai anora che quels daners vegnian puspè investids en il traffic public per exempel en lur bus gratuit da l'enviern.
Vischnancas han anc nagina invista en las cifras
Sco ils presidents communals ed il chanzlist han ditg hajan els anc nagina invista en las cifras. Uschia haja il chantun bain infurmà ch'ellas tutgian tar las 25 vischnancas e regiuns che survegnian enavos daners. Quant exact na savevan els dentant anc betg. Uschia saja la summa surprendenta.
RR novitads 12:00
Intginas vischnancas grischunas che han dabun daners da l'AutoDaPosta SA
| Tavau | 1'320'335 |
| Claustra-Serneus | 1'215'528 |
| Flem | 753'178 |
| Samignun | 471'475 |
| Vaz | 463'169 |
| Laax | 372'280 |
| Scuol | 271'925 |
| Falera | 130'233 |
| Surses | 105'468 |
| Lumnezia | 68'131 |
| Tumein | 66'698 |
| Mustér | 65'081 |
