Siglir tar il cuntegn

Header

Navigaziun

Legenda: Tadlar il audio Bunura: Survista da las votaziuns communalas. Durada 02:35 minutas.
Or da Actualitad dals 20.05.2019.
cuntegn

Votaziuns Votaziuns en vischnancas grischunas

  • Visualisaziun votaziun GEVAG
    Legenda: GEVAG RTR

    GEVAG

    La GEVAG, la corporaziun da vischnancas per dismetter rument, vegn schliada. Quai han decis las 25 vischnancas da las regiuns Cuira, Scanvetg, Signuradi, Partenz e Tavau che fan part a la GEVAG. La nova organisaziun duai esser ina fundaziun tenor dretg public. La decisiun da quella croda en la proxima radunanza communala da mintgina da las vischnancas participadas.

  • Vopna da Cuira
    Legenda: Cuira RTR

    Cuira

    Cun passa 55% GEA ha Cuira decis dad investir bun 24 milliuns francs per ina colliaziun directa si Brambrüesch. Gondlas da 10 persunas duain manar da Cuira a Brambrüesch – a Fülian duaja dar in staziun amez. La nova coaliziun duai remplazzar tant la cabina gronda da Cuira sin il Känzeli, sco era las gondlas veglias dal Känzeli fin si Brambrüesch.

  • Vopna da Flem
    Legenda: Flem RTR

    Flem

    Ils da Flem concedan in credit da 20 milliuns francs per ina cabina che maina en dus pass en il territori da l'Unesco – l'Arena tectonica Sardona. Questa colliaziun duai esser l'alternativa a la pendiculara da Cassons ch'è vegnida stgarpada giu. Previs è ina cabina da 150 persunas da Flem enfin Nagens ed ina segunda cabina da là enfin sin Ils Cugns – quai è sur il Plaun da Segnas, nua ch'il center per visitaders sa chatta. Sco emprim vegn bajegià la segunda etappa e persuenter dismess la sutgera da Foppa-Naraus. Silsuenter è previs la construcziun da l'emprima cabina da Flem fin a Nagens – persuenter vegn la cabina da Grauberg eliminada. En tut custa il project da l'Arena Alva 80 milliuns francs.

  • Vopna da Landquart
    Legenda: Landquart RTR

    Landquart

    La vischnanca da Landquart sanescha l'areal enturn la staziun. Il suveran è sa decidì da conceder in credit da 5,9 milliuns francs ed ha uschia tschernì la varianta bunmartgada cun asfalt nair. La varianta chara cun in credit da 7,9 milliuns francs per sanar la via cun crappa natirala (sco per exempel a Cuira) ha cunquai fatg naufragi. Dapi passa 10 onns vegn gia discutà a Landquart co sanar la via da la staziun per cumbinar las pretensiuns da traffic, parcadis e peduns.

  • Vopna da Vaz
    Legenda: Vaz RTR

    Vaz

    Votantas e votants concedan in credit dad 11 milliuns francs per engrondir la chasa da scola a Lai. Planisadas èn ulteriuras stanzas da scola sco er ina sala da cultura cun plazza per 250 persunas.

  • Vopna da Tavau
    Legenda: Tavau RTR

    Tavau

    Tavau ha adattà cun pli che 72% GEA sia lescha a la lescha federala davart abitaziuns secundaras. I va per l'ina per reglar la construcziun da novas abitaziuns secundaras e per l'autra per la transfurmaziun d’hotels e primas abitaziuns en abitaziuns secundaras. –––– Plinavant concedan prest 90% da las votantas e dals votants in credit dad 8 milliuns francs per in nov bajetg da scola a Bünda. Per l’ina dovra la scola integrativa dapli plazza e per l’autra quinta Tavau cun dapli scolars ils proxims onns. –––– Il pli cler sa decidan ils da Tavau cun prest 94% GEA per la midada da zona a favur dad in engrondiment da l’institut da perscrutaziun «AO Foundation». L’organisaziun da non-profit perscrutescha surtut ruttadira d’ossa e novas tecnicas d’operaziun e dumbra 330 collavuraturas e collavuraturs a Tavau. –––– En il segund scrutini per in sez en il parlament da Tavau va la cursa piz a cup: Hans Vetsch (senza partida) fa ella cun 1'173 vuschs cunter Claudio Rhyner (PLD) ch'aveva survgnì 1'057 vuschs. Vetsch remplazza a Christian Stricker ch’è vegnì elegì il november en suprastanza.–––

  • Vopna da Glion
    Legenda: Glion RTR

    Glion

    Il suveran da Glion è sa decidì per duas chaussas en connex cun las ovras electricas Zervreila: Per l'ina mida el cun 1'057 GEA a 139 NA il contract da concessiun e per l'autra approvescha el cun 1'055 GEA a 139 NA la valur restanta. –––– En la fracziun da Luven dovri ina sanaziun da l'entir provediment d'aua. Perquai conceda la vischnanca da Glion cun 1'136 GEA a 269 NA in credit da 3,7 milliuns francs. Previs è tranter auter da sanar las tschiffadas e lingias d'aua e da bajegiar in nov reservuar. ––––

  • Vopna da Lantsch
    Legenda: Lantsch RTR

    Lantsch

    Cun 132 cunter 93 vuschs di Lantsch GEA a la prolungaziun da la pista per ir cun skis cun rodas da l'arena da biatlon. Las votantas e votants han approvà in credit da 3,3 milliuns francs. Cun ina pista trais giadas pli lunga, lura da total 5,2 kilometers, spera l'arena da biatlon d'attrair stad ed enviern biatlets e passlunghists per lur trenaments. –––– Il suveran da Lantsch ha acceptà cun 213 GEA cunter 14 NA la revisiun da la constituziun chantunala. El pussibilitescha uschia er a persunas da l'exteriur da votar ed eleger en vischnanca – cun la cundiziun ch'ellas han il permis da dimora C e ch'ellas vivan dapi 5 onns en vischnanca. –––– Cun 207 GEA a 15 NA ha il suveran er concedì il credit da 1,2 milliuns francs per sanar vias e lingias d'aua a Tgampi Dameaz. Quai è l'emprima da pliras etappas d'ina sanaziun cumplessiva en vischnanca. –––– Tuttas trais fatschentas ha la radunanzas communala gia approvà.

  • Vopna da San Murezzan
    Legenda: San Murezzan RTR

    San Murezzan

    Cun 839 GEA a 256 NA decidan ils da San Murezzan da promover la cultura cun ina nova lescha. Quella duai reglar tenor tge criteris che la vischnanca sustegn tge projects ed instituziuns da la cultura. Da nov duai era dar ina cumissiun da cultura.––– En pli concedan ils da San Murezzan in credit da radund 1,7 milliuns francs per construir la rundella Dimlej.–––

  • Vopna da Cazas
    Legenda: Cazas RTR

    Cazas

    Il suveran da Cazas ha reelegì ses president communal Eduard Decurtins cun 463 vuschs per in’ulteriura perioda d’uffizi. Il pli absolut era tar 263 vuschs. En la suprastanza vegnan reelegids Doris Bundi-Allemann (420 vuschs), Brunno Rizzi (471) e Pascale Steiner (422). Nov elegì en la suprastanza è Patrik Gasser (425).

  • Vopna da Samignun
    Legenda: Samignun RTR

    Samignun

    Il suveran da Samignun ha augmentà la vegliadetgna dals pumpiers da 44 sin 50 onns. El ha approvà la revisiun parziala da la lescha da pumpiers cun 144 envers 93 vuschs. Questa revisiun è stada necessaria pertge che Samignun ha memia paucs pumpiers – da las 94 persunas cun obligaziun da far pumpiers èn mo radund 30 disponiblas en cas d’urgenza.––– En pli han las votantas ed ils votants approvà cun 89% da las vuschs in credit da 510’000 francs per ina nova lingia da pressiun tar il reservuar d’aua Salatsch e per engrondir il reservuar Votlas.–––

  • Vopna da Poschiavo
    Legenda: Poschiavo RTR

    Poschiavo

    Cun 91% da las vuschs datti in cler GEA da las votantas ed ils votants da Poschiavo a l'annexa a la concessiun cun la Repower. Quai è necessari damai ch'il concern d'energia vul renovar ils indrizs existents per la forza idraulica – senza dentant sclauder l'opziun da tuttina in di realisar il project Lagobianco – in'ovra d’accumulaziun a pumpa ch'è sistida al mument per motivs economics.

  • Vopna da Brusio
    Legenda: Brusio RTR

    Brusio

    La vischnanca da Brusio di cun 318 a 145 vuschs GEA ad in credit da bun in milliun francs per renovar la chasa communala. Quella è vegnida construida ils onns 60 e dovra ina sanaziun cumplessiva. La furma e l'idea dal bajetg concepida da l'architect bregagliot Bruno Giacometti duain vegnir mantegnidas. –––– Er las votantas ed ils votants a Brusio (sco quels da Poschiavo) din cleramain GEA a l'annexa a la concessiun cun la Repower – quai cun 416 cunter 30 vuschs. Il midament è necessari damai ch'il concern d'energia vul renovar ils indrizs existents per la forza idraulica – senza dentant sclauder l'opziun da tuttina in di realisar il project Lagobianco – in'ovra d’accumulaziun a pumpa ch'è sistì il mument per motivs economics.

  • Vopna da Claustra
    Legenda: Claustra RTR

    Claustra

    La populaziun da Claustra di cun 1'408 cunter 239 vuschs GEA ad in contract cun dretg da bajegiar per la firma da construcziun Vetsch. Sin l'areal che la firma aveva enfin uss prendì a tschains sa vegnir construì uschia ina nova halla da fabricaziun.

  • Vopna da Val
    Legenda: Val RTR

    Val

    La vischnanca da Val decida cun 285 GEA a 52 NA quatter adattaziuns da la planisaziun locala. Quellas èn necessarias sin giavisch da proprietaris da terren e pertutgan la zona da bajegiar.

  • Vopna da Panaduz
    Legenda: Panaduz RTR

    Panaduz

    Panaduz accepta cun 833 GEA cunter 56 NA dus affars en connex cun las ovras electricas Zervreila: Per l'ina vai per midar il contract da concessiun e per l'autra per approvar la valur restanta.

Dossier da votaziuns

RTR votaziuns 19-05-2019