Siglir tar il cuntegn

Chantun WEKO: chastis da milliuns per firmas da construcziun

En connex cun cunvegnas da pretsch en la branscha da construcziun sancziunescha la WEKO pliras interpresas en l'Engiadina ad in chasti da 7,5 milliuns francs. La Societad grischuna dals impressaris constructurs sto sco organisatur da las presesidas er sa participar als custs dal proceder.

Legende: Video WEKO chastia interpraisas en Engiadina cun plirs milliuns abspielen. Laufzeit 02:26 Minuten.
Or da Telesguard dals 26.04.2018.

Curt e concis:

  • Set interpresas ston pajar chastis pervia da surpassaments da la lescha da cartel.
  • L'autezza dal chasti dependa da quant fitg ch'ina interpresa ha cuntrafatg a la lescha.
  • La Societad grischuna dals impressaris constructurs n'è bain betg stada involvida cun las lavurs a moda directa. Ella ha dentant organisà las presesidas, nua ch'ina part dals surpassaments èn vegnids fixads.
  • Perquai sto la Societad sa participar als custs dal proceder.

En l'Engiadina han firmas da construcziun manipulà sur onns ils pretschs da lavurs en la construcziun bassa ed auta entras cunvegnas da pretsch: 7 firmas vegnan perquai fatgas responsablas da la WEKO cun in chasti da 7,5 milliuns francs. Las lavurs pertutgadas dals cartels han ina valita da plirs tschient enfin plirs milliuns francs.

Pertutgadas da las sancziuns èn:

  • Foffa Conrad SA
  • Bezzola Denoth SA
  • Zeblas Bau SA
  • Lazzarini SA
  • Koch SA Ramosch
  • Alfred Laurent SA
  • René Hohenegger Sarl

L'autezza da las sancziuns dependa da quant fitg che las singulas interpresas han surpassà las leschas da cartel, da la svieuta dals davos trais onns e sch'ina interpresa è s'annunziada da sasezza u betg. Uschia ston tschertas pajar enfin 5 milliuns francs, entant ch'autras pajan be 10'000 francs.

Dir tutgan las sancziuns cunzunt la gruppa da Foffa Conrad (Foffa Conrad SA, la Bezzola Denoth SA e la Zeblas Bau SA ) cun chastis da 4,7–5,5 milliuns francs. Ed era la Lazzarini SA survegn in chasti da milliuns – l'interpresa sto quintar cun 2–2,5 milliuns francs. La Koch SA Ramosch vegn sancziunada ad ina summa cun 6 cifras (260'000–230'000) e l'Alfred Laurent SA e la René Hohenegger Sarl vegnan davent cun pli pauc che 70'000 francs.

Rolla da la Societad grischuna dals impressaris

La Societad grischuna dals impressaris è stada involvida en connex cun l'organisaziun da talas presesidas, a quellas ch'ina part da las cunvegnas illegalas èn vegnidas discurridas. Quai ha confermà la WEKO en ses rapport. Tar questas presesidas è per exempel vegnì discurrì tgi che surpiglia las lavurs ed a tge pretsch. La societad è uschia bain betg incumbensada cun ils affars manipulads, ha dentant stgaffì la basa per che las interpresas possian reparter lavurs e fixar pretschs.

Uschia na pajan els nagin chasti da sancziun. Sco organisatur da las presesidas ch'han gì lieu enfin il 2008, sto la Societad però sa participar als custs dal proceder.

Las decisiuns da la WEKO pon vegnir tratgas vinavant a la dretgira administrativa federala.

Tge è la WEKO?

La Cumissiun da concurrenza (WEKO) è responsabla per la protecziun da la concurrenza en Svizra. Sia incumbensa è da cumbatter cartels nuschaivels. Ella surveglia plinavant ch'interpresas, che domineschan il martgà, na maldovrian betg lur pussanza. Plinavant controllescha ella er la fusiun d'interpresas.

I n'è betg l'emprima giada che la branscha da construcziun grischuna vegn sancziunada da la WEKO. Gia il fanadur 2017 aveva ella scuvert cunvegnas da pretsch illegalas en la Val Müstair, ch'eran vegnidas fatgas tranter il 2004 e 2012.

RR novitads 07:30