Siglir tar il cuntegn

Header

video
Donns el guaud da Latsch – èn ils tschiervs la culpa?
Or da Telesguard dals 10.01.2024.
laschar ir. Durada: 3 minutas 15 Secundas.
cuntegn

Chatscha 2023 Ademplì 93% dal plan per ils tschiervs

L’aura ha fatg greva la chatscha 2023 en il Grischun – cun la bell’aura e las temperaturas autas dal settember e la blera naiv l’entschatta december. Cunzunt il resultat tar ils tschiervs è cleramain pli bass che planisà, scriva il chantun.

La bilantscha da chatscha en cifras

Avrir la box Serrar la box
  • Cun sajettar totalmain 4’909 tschiervs han las chatschadras ed ils chatschaders cuntanschì il plan per 93%. 369 tschiervs avessan anc stuì vegnir sajettads tenor il plan da chatscha.
  • Tar ils tschiervs è il dumber dals animals feminins sajettads relevants per la regulaziun. Cun 2’450 animals feminins sajettads saja il plan qualitativ vegnì ademplì per radund 80%, tge che saja cuntentaivel sco ch'i resulta da la communicaziun dal chantun.
  • Cun il resultat da 2’982 chavriels sajettads è il plan cuntanschì per 98%.
  • En pli han chatschadras e chatschaders sajettà 3'067 chamutschs e 71 portgs selvadis.
    audio
    Bilantscha da chatscha 2023: finamiras fitg pretensiusas
    ord Actualitad dals 10.01.2024. Maletg: Keystone
    laschar ir. Durada: 3 minutas 17 Secundas.

    4'909 tschiervs han chatschaders e chatschadras sajettà durant la chatscha 2023. Sut il stritg èn quai 369 pli pauc che l'Uffizi da chatscha e pestga aveva previs en ses plan da reducziun.

    Er sche nus na cuntanschain betg dal tut il plan da sajettar, pudain nus ir da quai anora che nus cuntanschain la finamira da regulaziun e reducziun. Quai sa mussa però la primavaira.
    Autur: Lukas Walser Uffizi da chatscha e pestga

    Dapi plirs onns en roda saja il plan da reducziun stà ambizius, tge che saja er ina raschun daco ch'il plan da sajettar tschiervs è quest onn be vegnì cuntanschì per 93%, declera Lukas Walser, manader da la partiziun selvaschina e chatscha tar l'Uffizi da chatscha e pestga. Cunquai ch'ins saja dapi plirs onns en ina fasa da reducziun ed i dettia cunquai er ina chatscha intensiva, emprendian ils tschiervs da guntgir al squitsch da chatscha, uschia Lukas Walser. Per l'autra haja er l'aura in'influenza sin il success da chatscha, accentuescha el vinavant.

    L'influenza da l'aura sin la chatscha 2023

    Avrir la box Serrar la box

    Durant la chatscha auta èsi stà chaud e bel, uschia ch'i haja dà ina chatscha auta plitost sut la media. Mez november avevi gia en las regiuns pli en ils auts ed en ils auts ina cuverta da naiv serrada. Cundiziuns optimalas en tschertas regiuns per la chatscha speziala, sco igl ha num en la communicaziun. La blera naiv da l'entschatta december haja lura dentant sfurzà d'interrumper en l'entir chantun la chatscha. L'autezza da la naiv ha lura impedì dal tut la chatscha speziala en las regiuns pli autas da la Surselva, da l'Engiadina e dal Grischun Central. Quai or da raschuns da la protecziun d'animals.

    Sfida cunzunt en Grischun Central

    Il mument saja cunzunt grev da cuntanscher en il Grischun Central las cifras dal plan da reducziun. Dasper l'aura e las navadas entschatta december engrevgeschia la gronda preschientscha dal luf en la regiun la chatscha. Tenor Lukas Walser saja grev da giuditgar tge influenza ch'il luf haja direct sin il dumber da populaziun da tschiervs e tge influenza ch'il luf haja sin il cumportament da la selvaschina.

    Consequenzas per il guaud sch'i ha blers tschiervs

    Blers tschiervs muntan era blers donns en il guaud. Quai mussa l'exempel dal guaud da protecziun sur Latsch al Culm da Latsch. Oravant tut las plantinas giuvnas pateschan e vegnan magliadas da la selvaschina. Per Urs Fliri, manader revier forestal, èsi impurtant da proteger uschè bain sco pussaivel las plantinas. Quai funcziuna be cun saivs – dentant è quai ina mesira be per singuls tocs dal guaud. I n'è betg pussaivel da proteger l'entir territori uschia. Uschia vegnan protegids las regiuns nua ch'igl ha foras en il guaud, per che quellas pon almain sa serrar.

    audio
    Chatscha sin tschiervs e consequenzas per il guaud
    ord Actualitad dals 12.01.2024. Maletg: RTR
    laschar ir. Durada: 2 minutas 48 Secundas.

    RTR novitads 09:00

    Artitgels legids il pli savens