En tut èn vegnids sajettads 5'335 tschiervs en il Grischun, quai saja cun 98% ina buna quota di Hannes Jenny da l'Uffizi da chatscha e pestga suenter la chatscha auta e la chatscha speziala. Ordinà da sajettar eran en tut 5'430 tschiervs. Cunzunt animals masculins hajan ins pudì sajettar blers, pli pauc buna è la bilantscha da las vatgas-tschierv. Là han chatschadras e chatschaders sajettà 500 damain che ordinà tenor plan (3'145 animals).
Durant la chatscha speziala han ins sajettà 1'488 tschiervs.
Er il 2022 ha il chantun ordinà ina chatscha speziala
Per cuntanscher ils plans da regulaziun ha il chantun ordinà ina chatscha speziala sin chavriels, tschiervs e portgs selvadis. Per l'emprima giada ston er chamutschs d'in onn vegnir sajettads, quai pervia da donns da guaud.
Er quest onn hai duvrà ina chatscha speziala durant il november e december en il Grischun. En tut las 21 regiuns han anc stuì vegnir sajettads en tut 2'158 tschiervs. Pervia da la buna chatscha da tschiervs èn quai 300 pli pauc ch'anc l'onn avant. Quai communitgescha l'Uffizi da chatscha dal Grischun. Ils blers tschiervs ston vegnir sajettads en la Mesolcina, Calanca, Foppa, Lumnezia sco er Alvra e Surses.
En 14 da las 21 regiuns dovri ina chatscha supplementara sin chavriels, quai per sajettar en tut 367 chauras-chavriel ed ansiels. Ordinada è questa chatscha per exempel en il Partenz, Tavau, Val dal Rain enfin Stussavgia, parts da l'Engiadina e Samignun, Puschlav, Mesolcina e Calanca.
Chatscha sin chamutschs e portgs selvadis
Per l'emprima giada insumma ha il chantun ordinà da sajettar chamutschs d'in onn, quai en las regiuns Val dal Rain e Tumleastga. La raschun è d'evitar pli gronds donns entras selvaschina en ils guauds. Questa chatscha vegnia dentant restrenschida sin quatter regiuns problematicas.
Er ils portgs selvadis ston ins regular vinavant, perquai ch'els chaschunan gronds donns en l'agricultura en la Mesolcina. Els dastgan vegnir sajettads senza contingent durant la chatscha il november e december.
Sistem en duas fasas fa vinavant senn
Malgrà che la chatsch'auta è stada buna pervi da las bunas cundiziuns da l'aura datti er quest onn ina chatscha speziala. Quai fetschia er senn e saja sa cumprovà, uschia Hannes Jenny da l'Uffizi da chatscha e pestga. Che chatschadras e chatschaders stoppian anc sajettar 40% dal dumber da tschiervs saja en il rom dals davos onns. La raschun per quai è tranter auter che blers tschiervs èn actualmain anc gnanc en il Grischun.
Nus avain in'immigraziun da tschiervs ord 11 pajais, chantuns e provinzas cunfinantas ed igl è in fauss intent da vulair regular quai gia finalmain durant il settember.
Il concept da duas fasas ch'è vegnì sviluppà da l'uffizi saja fatgs aposta per la situaziun en il Grischun cun tschiervs che migreschan. Cun quest sistem saja er pussaivel da cuntanscher la finamira da sbassar la populaziun dals tschiervs, uschia Hannes Jenny vinavant.
Da decimar il dumber da selvaschina gidia dentant er la populaziun da lufs ch'è creschida.
Per part èn dapli vatgas da tschierv vegnidas sajettadas perquai ch'ellas han pers lur vadels durant la stad.
En tschertas regiuns hajan ils lufs er procurà per ina meglra repartiziun da la selvaschina e quai haja er manà tar dapli animals sajettads. Sper quai dettia er regiuns nua ch'ils lufs han effectiv decimà il dumber da selvaschina. Il luf vegnia en scadin cas er en il futur a gidar da cuntanscher las finamiras da l'Uffizi da chatscha e pestga puncto regulaziun.
