En tut 7'700 tschiervs, chavriels, chamutschs e portgs selvadis han chatschaders e chatschadras sajettà quest onn durant la chatsch'auta. Quai èn 700 animals dapli che l'onn passà. Èn congual cun l'onn avant munta quai:
- 20% dapli tschiervs
- 11% dapli chavriels
- 1% dapli chamutschs
Quai èn dentant be las cifras provisoricas che l'Uffizi da chatscha dal Grischun ha controllà fin uss. Tenor Hannes Jenny possian ins dentant gia discurrer d'ina buna chatsch'auta. En il congual cun ils davos 10 onns sajan ins tar ils tschiervs sur la media, tar chavriels e chamutschs en la media.
Bun'aura sco motiv principal
Sco motiv per las bleras predas numna Hannes Jenny surtut l'aura: Ins n'haja mai gì blera naiv che avess impedì la chatscha. Er lungas fasas da plievgia n'haja betg dà. Cunquai ch'i haja navì in pau en las regiuns autas e la vegetaziun saja ida enavos, saja dapli selvaschina vegnida en las regiuns pli bassas – ed uschia en ils reviers da chatscha.
Tge che quai munta puncto chatscha speziala na sa lascha actualmain betg dir. Ins stoppia spetgar sin las cifras definitivas che suondian las proximas duas emnas. Pir lura saja cler en tge regiuns ch'ina chatscha speziala saja necessaria. Tenor Hannes Jenny vegnia dentant probablamain er quest onn a dar ina gronda chatsch'auta. Quella cumenza lura ils 29 d'october.
La chatscha sa mida
Cun la preschientscha dals lufs sa midan er las pretensiuns per la chatsch'auta. La selvaschina sa disa tenor il guardiaselvaschina da Glion, Gieri Derungs spert vi da la preschientscha dals animals da rapina.
Il luf è in chatschader fitg spezialisà. La dumonda è uss quant spezialisads ch'ils chatschaders sin duas chommas èn.
Ulteriurs facturs che han midà la chatscha sajan l'augment dal turissem ed il svilup tecnic tar l'equipament da chatscha. La pli gronda influenza sin in bun resultat da la chatscha grischuna n'ha dentant ni il luf ni la tecnica: L'aura saja il factur principal che decida sche la chatscha daventa buna u plitost mediocra, uschia Gieri Derungs.
