Siglir tar il cuntegn

Header

audio
Las raschuns per la problematica
Or da Actualitad dals 05.01.2023. Maletg: Keystone
laschar ir. Durada: 3 minutas 35 Secundas.
cuntegn

Chatscha speziala Manco da capacitads tar mazlarias

Durant la chatscha speziala n'han las mazlarias per part betg avunda capacitads d'elavurar la preda. En consequenza ston chatschaders e chatschadras per part sviar sin mazlarias ordaifer il Grischun. Il chantun è conscient da la problematica ed ha propostas per ina soluziun.

Tgi che va a chatscha, ha lura success e fa preda, tschertga silsuenter savens ina mazlaria ch'elavura la charn. Da chatscha speziala daventa quai però adina pli e pli grev da chattar ina mazlaria ch'ha las capacitads da far questa lavur, sco Hannes Jenny da l'Uffizi da chatscha e pestga conferma envers SRF.

Quella problematica è enconuschenta a nus. E quella s'accentuescha plitost mintg'onn.
Autur: Hannes Jenny Uffizi da chatscha e pestga

Dapertut n'è il problem betg tuttina grond. Acuta saja la situaziun cunzunt en il Grischun Central, sco il president da l'Associaziun professiunala da charn dal Grischun, Orlando Strub ha ditg envers SRF. Cunzunt là, ma er en autras regiuns, hajan chatschadras e chatschaders magari purtà adumbatten la preda en mazlaria, pertge quellas n'hajan betg gì avunda capacitads.

Intgins manaschias han stuì renviar la preda pervi da mancanza da capacitads.
Autur: Orlando Strub Associaziun professiunala da charn dal Grischun

Las raschuns sajan differentas: Sper la mancanza da persunal che pertutga bleras branschas, hajan las mazlarias durant il temp da chatscha speziala gia blera lavur. Lura sa preparian quellas sin la fatschenta da Nadal. Vitiers vegnia che mazlarias da grossists na prendian betg giu la lavur d'elavurar la preda.

Sin maisa cuschina u restar a chasa

Las consequenzas da la mancanza da capacitads èn diversas. I dettia chatschaders che s'annunzian tar mazlarias ordaifer il Grischun. Lura dettia er l'opziun d'elavurar sez la charn da selvaschina – en gliez cas na dastga la carn però betg vegnir vendida. E la consequenza la pli drastica che Orlando Strub numna: Chatschaders e chatschaders restan durant la chatscha speziala a chasa. Gest l'ultim fa quittads a Hannes Jenny da l'uffizi da chatscha. La motivaziun d'ir a chatscha speziala na dastgia betg ir a perder, per ch'i saja vinavant pussibel da sajettar ils animals tenor il plan dal chantun. Ed el agiunta che la problematica saja s'accentuada ils ultims onns perquai che adina damain persunas elavurian sezzas la charn ed èn pia dependentas da las mazlarias.

Propostas per soluziuns èn sin maisa. Per exempel stanzas fraidas per tegnair a frestg la preda.
Autur: Hannes Jenny Uffizi da chatscha e pestga

Da dismetter animals sajettads – senza duvrar la charn – na vegnia en mintga cas betg en dumonda, accentueschan omadus umens dumandads. La qualitad da la charn saja memia preziusa. Ina mesira che pudess gidar tant mazlarias sco er chatschadras e chatschaders fissi, sche la clientella consumass durant l'entir onn – e betg be durant il classic temp da chatscha – charn da selvaschina, uschia sco quai ch'igl è usità tar bleras famiglias da chatscha.

RTR actualitad 12:00

Artitgels legids il pli savens

Scrollar a sanestra Scrollar a dretga