Persunas en Grischun che sa sentan attratgas sexualmain d'uffants duain survegnir agid a moda simpla – e quai avant ch'ellas daventan culpablas. Quai pretenda ina trentina da deputadas e deputads dal Cussegl grond. En in'incumbensa dumondan els la Regenza, tge ch'è vegn actualmain fatg en chaussa e sch'ella fiss pronta da finanziar uschè ina purschida.
Tenor la deputada Laura Oesch ch'ha er suttascrit l'incumbensa, duai la purschida esser anonima e gratuita. Uschia possian ins gidar il pli bain a persunas pertutgas. Plinavant duai il chantun finanziar la terapia – subit che la terapia vegnia surpiglià per exempel da la cassa da malsauns, vegni pli pauc anonim. Perquai duai er il chantun metter en pè uschè in post, e betg las vischnancas. Er quai vai per anonimitad. Ina collavuraziun cun auters chantuns saja dentant er in'opziun.
L'incumbensa è vegnida inoltrada durant la sessiun d'avrigl. La Regenza ha uss temp da dar resposta fin tar la sur-proxima sessiun – pia la sessiun d'avust.
Bunas experientschas en auters chantuns
En auters chantuns è quai gia dapi intgins onns pussibel – per exempel a Turitg, nua che la clinica da l'Universitad ha uschè in post. Quella porscha sustegn gratuit ed a moda anonima. L'onn passà han passa 100 persunas s'annunziadas – tendenza vers ensi.
Dapli infurmaziuns
Ina purschida anonima e gratuita saja decisiva, uschia la manadra, Fanny de Tribolet, envers il schurnal regiunal da SRF. Persunas che sa sentan attratgas sexualmain d'uffants han savens sentiments da culpa e tema. In post anonim e gratuit gida da surmuntar quai e dad ir per agid, avant ch'i vegn propi ad in cas penal.
Adattà al tema
«Pedofilia? Na, quai na datti betg tar nus...». En la documentaziun «Zona grischa» d'avant tschintg onns han differents protagonists e protagonistas discurrì davart pedofilia en il Grischun e mussan cun quai che quella construcziun «quai na datti betg tar nus» è faussa.