«Churer Fest 2025» - Bunamain 100'000 visitaders a la festa da Cuira

A Cuira èn ils responsabels cuntents cun il «Churer Fest» da quest onn. 90'000 fin 100'000 persunas hajan fatg part a la festa da venderdi fin dumengia cun ina pluna sulegl, temperaturas da stad ed ina buna atmosfera, sco igl è scrit en ina communicaziun. Il president dal comité d'organisaziun, Fabio Adank, tira bilantscha positiva. Tenor Adank n'haja dà nagins incaps pli gronds. Pervia da la chalira saja blera glieud la sonda pir arrivada la saira. Las temperaturas han cuntanschì il suentermezdi fin 33 grads a Cuira.

Era la polizia da la citad da Cuira scriva d'ina festa paschaivla cun en tut 70 intervenziuns, da quellas sajan stadas 26 en relaziun directa cun la festa da Cuira. Lur concept da segirezza saja sa verifitgà. Be set persunas hajan stuì vegnir ospitalisadas.

Impressiuns

La festa da Cuira, il «Churer Fest» è tradiziun en la chapitala. Mintg'onn viva la festa da Cuira da las var 40 uniuns che han lur stans en la citad veglia da Cuira. Là porschan quellas divertiment, da mangiar e bavrondas. Dasper ils stans da las uniuns hai era dà passa 100 concerts sin differentas tribunas da la citad.

Radund 90'000 persunas han visità la festa da la citad da Cuira il 2024. En la galaria chattais inquala impressiun:

Impressiuns da la festa da Cuira 2024