La vischnanca da Churwalden po extender il provediment d'aua a Malix. La radunanza communala ha approvà glindesdi saira in credit da radund 1,14 milliuns francs per segirar il provediment cun aua da diever e per avair a disposiziun aua da stizzar fieu en ils quartiers Spina, Oberhus e Patnia da Malix. Quai communitgescha la vischnanca. Oz proveda il conduct da funtaunas Spina/Bundettis quests quartiers cun aua. Dentant ha quest reservoir be in volumen d'utilisaziun da ca. 2 meters cubic. En in cas d'incendi stat uschia be l'aua da funtauna a disposiziun.
Sanaziun implant da pumpadi d'aua sutterrana a Parpan
Plinavant ha la radunanza communala da Churwalden approvà in credit da 400'000 francs per sanar l'implant da pumpadi d'aua sutterrana a Parpan che vegn gia manà dapi il 1975. L'implant da pumpadi Gruoben survegn actualmain l'aua da la staziun da trafo veglia Schafhüschi tar la Kiwi Lodge. Questa staziun da tracziun proveda parcellas ordaifer la zonas da construcziun e na correspunda betg pli a las prescripziuns legalas.
Mesiras da protecziun da funtaunas sin l'alp da vatgas Malix
Ultra da quai ha la radunanza communala dà glisch verda ad in credit da 355'000 francs per mesiras da protecziun da las funtaunas sin l'alp da vatgas a Malix. Igl èn vegnidas fatgas controllas e lezzas hajan mussà ch'i dettia la ristga per ina contaminaziun da las auas.
