L'Assicuranza d'edifizis dal Grischun (GVG) ha fatg l'onn passà il segund grond gudogn da sia istorgia cun 52 milliuns francs – malgrà ch'igl è stà in onn cun blers donns. Quai suenter che la GVG ha fatg il 2018 ina sperdita da 18,4 milliuns francs. Quai cunzunt pervi dal schlet onn a la bursa ch’ha chaschunà in minus da passa 16 milliuns francs.
Blers donns il 2019
Ils donns dal 2019 sajan sur la media da 10 onns, tranter auter pervi da plirs gronds fieus, scriva l'Assicuranza d'edifizis dal Grischun. Tranter auter han ils incendis da la garascha da l'AutoDaPosta a Cuira, l'incedi da l'Ems-Chemie e da la chasa Carigiet a Trun chaschunà donns gronds. En total han tut ils brischaments custà 15 milliuns francs. Uschia saja il budget per tals donns vegnì surpassà per 2,8 milliuns. Era tar ils donns elementars – sco per exempel tras bovas u lavinas – hajan els registrà cun 1'091 registraziuns da donns trais giadas uschè blers cas sco usità.
Assicurads profiteschan dal gudogn
Dal gudogn da 52 milliuns francs profiteschan era ils assicurads. Quels survegnan l'onn proxim in rabat sin las premias en la valita da 27 milliuns francs. Ils ulteriurs 25 milliuns van en las reservas.