La hotellaria grischuna ha nudà l'emprim semester da quest onn 1,4% dapli pernottaziuns. Cumpareglià cun il medem temp da l'onn passà è il dumber creschì per passa 37'000 sin radund 2,7 milliuns pernottaziuns. Quai resulta da las cifras provisoricas da l'Uffizi federal da statistica.
Creschida è surtut la cifra da giasts da l'India, quai per 94%, suandà da la China cun in augment da 22%. Il pli grond regress hai dà da giasts da la Norvegia cun 20%, suandà da l'Austria cun 6,6%.
Hotellaria svizra
En l'entira Svizra è il dumber da pernottaziuns creschì per 1,5% (277'000 pernottaziuns) sin radund 18,7 milliuns pernottaziuns. Cun totalmain 10,3 milliuns pernottaziuns è la dumonda da giasts da l'exteriur creschida per 1,8% (184'000 pernottaziuns).
Augment da giasts da l'exteriur:
- Pajais americans cun 8%; ils giasts vegnan spezialmain dals Stadis Unids cun 10,4%.
- Pajais asiatics cun 4,2%; ils pli blers giasts vegnan da la China cun 7,7%.
RR novitads 09:00
