Sco quai ch’il cumandant dals pumpiers da Cuira Hansjörg Erni ha ditg envers RTR, cuntanschian ins cun questa midada dapli entradas. Quai saja fitg impurtant, perquai che las expensas sajan s’augmentadas ils davos onns. Cun augmentar la vegliadetgna da far servetsch da pumpiers, na stoppia la citad betg auzar la taxa che custia actualmain 90 francs per onn. Il medem mument ins profitia da la savida dals pumpiers che possian ussa star pli ditg en servetsch. Ils pumpiers hajan fatg las suandantas ponderaziuns, di Hansjörg Erni:
- Esser pli vegl na munta ozendi betg avair ina sanadad main buna.
- Pli vegl ch'insatgi è e pli fitg è ses domicil definitiv (en quest cas a Cuira).
- Ils uffants èn gia pli gronds ed uschia ha la glieud dapli temp liber.
Tschintg activs èn sur 50
Il mument sajan tschintg dals pumpiers activs en la vegliadetgna da 50 fin 55 onns, ha ditg Erni. Actualmain dumbran ils pumpiers da Cuira radund 100 persunas, da quai èn radund 10 pertschient dunnas. Il preventiv dals pumpiers da Cuira munta tranter 1,5 ed 1,7 milliuns francs per onn.
Normalmain finescha il servetsch cun 50
En las bleras vischnancas dal Grischun finescha il servetsch da pumpiers cun 50 onns, ha ditg l’inspectur dals pumpiers chantunal Conradin Caduff. Che Cuira auzia la vegliadetgna sin 55 onns, saja plitost nunusità en il chantun. Mo Avras/Farera haja ina vegliadetgna anc pli auta. Là valia l’obligatori da far servetsch da pumpiers fin 60 onns. Quai haja da far cun il dumber pitschen da la populaziun, uschia Caduff. En il Grischun saja la situaziun da voluntarias e voluntaris buna. Mo paucas vischnancas hajan il mument problems d’occupar tut ils posts.
En il Grischun datti il mument radund 4'000 pumpieras e pumpiers activs. Anc avant 25 onns eran quai dubel uschè blers. Oz dovra quai pli paucs, perquai che l’infrastructura è vegnida pli moderna, e perquai che bleras vischnancas han fusiunà lur corps da pumpiers.
