Siglir tar il cuntegn

Header

video
Stgaudar Cuira cun aua sutterrana
Or da Telesguard dals 17.11.2022.
laschar ir. Durada: 3 minutas 35 Secundas.
cuntegn

Citad da Cuira Vegnir liber dal gas cun aua sutterrana

La chapitala dal Grischun è oz enorm dependenta dal gas. Passa 2'500 chasada vegnan stgaudadas e cuschinan cun l'energia fossila. Fin il 2040 vul Cuira però vegnir cumplettamain libra d'energias fossilas – cun agid da l'aua sutterrana.

La strategia da la IBC è, da porscher energia persistenta e CO2 neutrala enfin l’onn 2040. La citad da Cuira vul sustegnair quest project cun 60 milliuns francs. En il parlament ha questa tractanda dà da discutar. Dentant manegia la gronda part dal parlament che questa investiziun saja necessaria per il futur. Tut las partidas, cun excepziun da la PPS, han votà Gea per il credit da 60 milliuns per la IBC. La fin finala ha il parlament da Cuira approvà la proposta da la suprastanza cun 17 cunter 4 vuschs. Il credit duai vegnir pajà ora a l'IBC en 12 transchas da 5 milliuns en ils proxims 12 onns. L'ultim pled hai dentant il suveran. I da anc ina votaziun dal pievel.

audio
Parlament Cuira: credit da 60 milliuns per IBC
ord Actualitad dals 18.11.2022. Maletg: RTR
laschar ir. Durada: 3 minutas 39 Secundas.

En tut passa 300 milliuns

Per vegnir liber d'energias fossilas vul il provedider d'energia da la citad, l'IBC, investir tranter auter en stgaudaments che furneschan energia per entirs quartiers. Gia l'onn 2013 ha la citad realisà sco ina da las emprimas citads en Svizra in tal sistem per Chur West. Uss vul ins schlargiar la rait per tals stgaudaments decentrals. Spezial vi da quella tecnica è che l'energia per quests stgaudaments vegn da l'aua sutterrana.

Energia or dad aua sutterrana

Quai funcziuna vairamain precis sco ina pumpa da chalur. La pumpa tira in pér grads or da l'aua sutterana che ha 8 fin 12 grads. Cun questa energia stgauda la pumpa da chalur lura autr'aua che vegn manada tar la chasadas. Quellas dovran la chalur e l'aua chauda turna puspè tar la pumpa, nua ch'ella po puspè vegnir stgaudada. Ils stgaudaments decentrals duain cumplettar sistems convenziunals sco per exempel quel da la chalur a distanza, che Cuira retira dapi onns da l'implant per arder rument a Vaz sut.

Or da l'archiv

video
Stgaudar cun aua sutterrana – Ils privels e las schanzas.
Or da Cuntrasts dals 25.09.2019.
laschar ir. Durada: 4 minutas 27 Secundas.

RTR Telesguard 17:40

Artitgels legids il pli savens