Siglir tar il cuntegn

Header

audio
Citad da Cuira: dapli debits per investir
Or da Actualitad dals 17.11.2022. Bild: Keystone
laschar ir. Durada: 3 minutas 44 Secundas.
cuntegn

Dapli debits per Cuira Parlament sposta la decisiun sin pli tard

La radunanza dal parlament da la citad da Cuira ha decidì da far ina cumissiun da lavur per la finanziaziun dals projects da generaziun. Il cussegl da citad aveva fatg la dumonda da pudair far dapli debits.

Il cussegl da citad vul dapli debits per projects da generaziuns

Ussa è la regla che las finanzas da la citad da Cuira na pon betg crudar sut la quota d'agen chapital da 60%. Vul dir ch'ins na po betg avair dapli che 40% debits. Cun quai che blers projects gronds, uschenumnads projects da generaziuns èn planisads, dumonda il cussegl da citad da sbassar questa quota sin 50%. Exempels da project èn ils indrizs da sport «Eisball» a la Obere Au, sanaziuns da diversas chasas da scola, la sanaziun dal teater da Cuira, la colliaziun da la via da Malix cun il Rosenhügel u il credit da la IBC.

Il president da la citad, Urs Marti, argumentescha questa dumonda cun las finanzas fitg stabilas da Cuira. En ils ultims diesch onns ha la citad fatg grondas investiziuns e tuttina saja il chapital agen sur 70%. Or da quai suonda che Cuira ha mo circa in quart chapital ester.

Cuira è la citad cun il pli grond possess finanzial en Svizra.
Autur: Urs Marti president da citad

Tenor Urs Marti haja la citad ils meds per prender si dapli chapital ester per pudair investir dapli. El di ch'er ina quota da 50% da chapital agen fiss anc sauna per las finanzas da la citad da Cuira.

Parlament vul decider pli tard

Il parlament da Cuira n'ha betg decidì sche la citad po far dapli debits. Cun 19 cunter 2 vuschs ha el decidì ch'ina cumissiun da lavur or da tschintg parlamentaris da differents partidas vegnan a discutar la dumonda en ils proxims mais. Ina decisiun finala duai vegnir communitgada l’onn che vegn.

RTR actualitad 12:00

Artitgels legids il pli savens

Scrollar a sanestra Scrollar a dretga