Sch'ins è amez la citad veglia e va vers il plaz Arcas, van ins sper pliras stizuns, coiffeurs e restaurants ora. Tranter els era ina butia che n'è anc betg uschè ditg en quest lieu – il Membrini. Ina stizun enconuschenta che ha tradiziun en la citad veglia da Cuira. La possessura Marisa Membrini cun ses vestgì elegant e ses chavels nairs di: «Jau pens ch'ins sto far insatge per far la citad veglia pli attractiva.»
Nus percurschin ch'ins sto dar adina dapli fadia – i na basta betg pli d'avair ina butia cun bella rauba.
Cura ch'ins è en la citad veglia, datti numerusas pussaivladads dad ir en differentas giassas che n'èn betg fitg frequentadas. Ed in café dat immediat en egl – Zuzu's Cupcakes. Tut è numnadamain pinc. Las paraids èn pincas, las maisas, las sutgas, ils maletgs vi da las paraids, ils muffins e la vaschella davos la vitrina.
-
Bild 1 von 5. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
La dunna pitschna cun ils chavels blonds prenda in pau pasta, smatga quella en ina furma d'in urs. Ses café saja in success, di ella. Ella haja adina dapli giasts.
Jau hai il sentiment ch'i vegnia mintg'onn adina dapli glieud – blers giasts regulars, fidaivels gia dapi 10 onns, quai ma commova fitg.
Davos il Kornplatz, en in'autra giassa che n'è betg uschè frequentada, datti ina butia che ha da morder fitg. En la vitrina hai vestgadira eleganta e sur porta stat «Ladina Bundi» cun letras alvas. Davostiers sesa ina dunna pli giuvna cun chavels stgirs, ina designra da moda. I tuna auter tar ella. I saja difficil, di Ladina Bundi.
Igl è grev. Blers van simplamain sperasvi, na gughegian betg dad ir en butia. Quai èn surtut ils indigens e las indigenas.
Ella saja dentant era conscienta, che ses products tutgan en in'autra categoria da prezi. In t-shirt sin ina cumoda custa 350 francs. Il viadi tras la citad veglia da Cuira mussa, che tschertas butias marschan adina meglier, entant ch'i dat era fatschentas che n'èn betg cuntentas cun lur affars.
Citad da Cuira anc adina in lieu impurtant per far cumpras
Las fatschentas a Cuira èn pli e pli sut squitsch: il commerzi d’online crescha, ed il fashion-outlet tiria adina dapli consuments e consumentas a Landquart. A quai trend vulan la citad da Cuira e la regiun Plessur far frunt. Perquai han els incumbensà la Scola auta spezialisada d’intercurir la situaziun da commerzi a Cuera ed Arosa. Passa 1'500 persunas han fatg part dal studi. Victor Zindel da la regiun Plessur ed incumbensader dal studi è cuntent cun la participaziun.
Il studi mussia cleramain che la citad da Cuira è e resta vinavant impurtanta per la regiun sch'i va per ir a cumprar en. Prest 70% da las persunas dumandadas giajan ina enfin dus giadas l'emna en las stizuns, 13% perfin mintga di. Quai saja ina auta frequenza e suttastritgia l’impurtanza da la citad, uschia Victor Zindel. Interessant saja era che mo cnap 9% da las persunas dumandadas giajan sur il cunfin en l’Austria a cumprar en.
In uschenumnà «Lädelisterba» fissi sche las fatschentas murissan ora, quai n'è tuttavia betg il cass.
Pussaivladads da far frunt a las sfidas actualas cun cumpras online ed autras purschidas dettia bain, sco quai ch'il studi mussa. Ils consuments e las consumentas giavischian cunzunt ina pli gronda schelta e novas marcas da moda e lifestyle. In basegn ch'ins pudess ademplir cun attrair marcas internaziunalas a Cuira. Quai na saja dentant betg uschè simpel, declera Victor Zindel.
Grondas marcas dovran autas frequenzas. E qua è Cuira memia pitschen.
Ditg curt: quai che funcziunia a Turitg, valia betg exnum per Cuira. Ina autra proposta co far pli attractiv la purschida saja da promover stizuns da pop-up. Quai vul dir stizuns provisoricas ch'i dat mo per in temp limità. Ideal per dar ina plattafurma a glieud creativa e curaschusa, ina mesira che la citad da Cuira vuless promover en l'avegnir.
Il concept da pop-up è in instrument genial cun il qual ins sa metter en moviment bler.
In ulteriur punct: sper il sortiment dovria era in'atmosfera pli attractiva ch'envidia da flanar atras la citad. Quai vul dir, dapli cafés, ustarias e bars. E qua stoppia la citad daventar pli activa. In bun exempel saja il plaz sper la baselgia Son Martin en la citad veglia. Là vegnia bainprest libra la surfatscha dal pasterner Allegra. I saja essenzial da nizzegiar quella surfatscha cun las fatschentas vischinantas.
Il barat cun differents acturs è central: dal possessur da la localitad a fatschentas vischinantas. Uschia pon ins garantir ina buna qualitad per il quartier.
Cler, adina na possia la citad betg influenzar la dinamica. Ma sch'ins haja in bun barat cun tut ils acturs saja pussaivel da metter tscherts accents, è Victor Zindel pervadì. Quain giaschia a cor a la citad da Cuira e la regiun Plessur. En l'avegnir duess tut vegnir coordinà ed orchestrà anc pli fitg d'in uschenumnà city manager. Victor Zindel vesa grond potenzial en ina tala persuna. En in proxim pass duai anc dar in studi cun possessurs da las fatschentas per anc survegnir questa perspectiva.