Cun 58% ha il suveran da Claustra approvà la construcziun d’in implant solar sin il territori Züg a Madrisa. En in’ulteriura votaziun ha la vischnanca concedì in credit per contribuir a 34% dal chapital d’aczias da la societad da l'ovra. 55,8% èn sa participads a la votaziun.
Cun quai veglia la vischnanca cundecider en dumondas strategicas e profitar d’eventualas dividendas, uschia infurmescha il messadi da votaziun. La maioritad d’aczias vegnia la Repower SA a tegnair.
Ultra da quai prevesa il contract tranter la vischnanca e la Madrisa Solar SA ina indemnisaziun da basa da 0,75 raps per ura kilowatt. En tut vegnia l’implant a producir 18 milliuns uras kilowatt, avunda per 4’000 chasadas. Il lieu saja accessibel sur vias ed è en vischinanza da la staziun da las pendicularas Madrisa.
Igl è previs che l'implant po profitar tant d’ina procedura d’approvaziun levgiada sco er da la participaziun finanziala da la Confederaziun en il rom dal Solarexpress ch’il Parlament svizzer ha decis la stad 2023. En tut vala il contract per 67 onns, suenter ha la vischnanca la pussaivladad d’acquistar l’implant.
