Sin l'areal da la staziun da tren a Claustra duai dar ina nova surbajegiada cun abitaziuns per indigenas ed indigens. Quests plans prevesa il project directiv che la Viafier Retica ha elavurà. Quai communitgeschan communablamain la Viafier retica e la vischnanca.
Là nua ch'il bajetg da la staziun, l'uschenumnà Kulturschuppen, ina chasa da pliras famiglias ed in parcadi public stattan oz amez Claustra, vul la Viafier retica bajegiar ina surbajegiada cun abitaziuns pajablas.
El plaun terren duai dar spazi per il commerzi e sutterran ina garascha. Ed il conturn da la staziun duai envidar indigenas ed osps a flanar. Davart ina revisiun da la planisaziun locala ch'è necessaria decida Claustra il pli baud l'atun en in onn.
Ed er il center da Claustra duai sa sviluppar. Tenor la communicaziun prevesan lezs plans medemamain da bajegiar abitaziuns, parcadis e da stgaffir spazi per il commerzi.
