Siglir tar il cuntegn

Header

audio
Uvestgieu: Uniun da spirituals Cuira na suttascriva betg il codex
Or da Actualitad dals 27.11.2023. Maletg: Keystone
laschar ir. Durada: 3 minutas 59 Secundas.
cuntegn

Codex da cumportament Betg tuts vulan suttascriver – l'uvestg accepta

Avant bun in onn e mez ha l'uvestgieu da Cuira preschentà in codex da cumportament. Quai cun la finamira da prevegnir ad abus sexuals entras spirituals. In codex che mintgin e mintgina che lavura per l'uvestgieu haja da suttascriver, uschia avevi num da lezzas uras.

Resistenza dapi l'entschatta da l'uniun da spirituals da Cuira

Che betg tuts van d'accord cun las clauslas en il codex è sa mussa gia baud. L'uniun da spirituals da Cuira ha pliras giadas communitgà ch'els n'acceptian betg tut ils puncts. Els van d'accord cun 98% dal codex. Il dretg da decider sez co viver la sexualitad e nagina discriminaziun pervia da l'orientaziun sexuala, cuntrafetschian tenor els però a la ductrina. Plinavant crititgeschan els che l'uvestg Joseph Maria Bonnemain veglia porscher il maun ed implementar l'ideologia da LGBT en la baselgia e quai sut il chapè da vulair far prevenziun d'abus. Els sajan be pronts da suttascriver sche betg tut las clausulas sajan liantas.

Tschertgà pliras giadas il discurs senza success

Sco retschertgas dal schurnal regiunal da SRF mussan, va l'uvestg d'accord cun quai. El haja tschertgà duas giadas il discurs ed haja empruvà da persvader l'uniun da spirituals da Cuira da suttascriver, ma senza success. Impurtant saja tenor el il cumportament e la tenuta e betg be ina suttascripziun. Cas nua che la tenuta na constat betg n'èn betg enconuschents a l'uvestg Joseph Maria Bonnemain.

Opiniuns divididas

Il responsabel per prevenziun tar l'uvestgieu da Cuira, Stefan Loppacher chapescha daco che l'uvestg ha decis uschia, el vesa dentant critic la culanza. La segirtad da persunas saja pli impurtanta che cumpromiss sch'i giaja per prevenziun. Sch'ins na veglia betg suttascriver, lura mussia quai era ch'ins possia betg reflectar la problematica.

Entaifer la Baselgia catolica dal Grischun èn las opiniuns spartidas. Dad ina vart datti chapientscha ed i saja da tolerar che betg tuts acceptian mintga punct dal codex. Da l'autra vart datti era l'opiniun ch'i dovria ina clera lingia sch'i va per il codex. 

RTR actualitad 11:00

Artitgels legids il pli savens