Il traffic da return ha cumenzà glindesdi da mezdi. En il Grischun sin l'A13 en direcziun nord hai colonnas tranter Giuvaulta e Rehanau/La Punt sco era tranter Lostallo e Mesocco. IL TCS stima ch'il viadi cuzza enturn 40 minutas pli ditg.
Er sin il traject dal Gottard tranter Faido ed Airolo hai colonnas, ils 10 kilometers muntan in temp da viadi dad in'ura e mesa pli ditg. Er en direcziun sid hai 8 kilometers colonna, il viadi cuzza passa in'ura pli ditg.
Er l'emna suenter Pasca avertescha l'Uffizi federal da vias ch'i vegnia punctualmain a colonnas ed er per la fin d'emna dals 10 fin ils 12 d'avrigl è la prognosa: bler traffic sin via.
Per transportar l'auto tras il tunnel dal Vereina èsi da quintar cun in temp da spetga da radund ina ura a Sagliains.
Traffic vers sid: 21 kilometers avant il Gottard e 6 kilometers sin l'A13
L'emprima gronda unda da traffic sin la ruta dal Gottard durant ils dis da Pasca è passada. Il venderdi sontg ha laschà crescher las colonnas d'autos sin viadi vers sid sin maximal 21 kilometers. Tranter 3 e 4 uras dapli temp da viadi han questas colonnas muntà per ils automobilists e las automobilistas. En il decurs da la saira è il traffic lura sa normalisà pli e pli fitg. La sonda da Pasca era la colonna creschida sin var 6 kilometers. En il decurs dal suentermezdi è dentant er quella sa schliada.
Sin l'autostrada A13 en direcziun sid ha il traffic laschà suenter venderdi saira, ed enturn las 6 eran las colonnas sa schliadas. La pli lunga colonna sin l'A13 il venderdi sontg muntava ad in temp da viadi pli lung dad in'ura e mesa. La sonda èsi stà quiet.
Igl è da quintar cun bler traffic
Bler traffic, lungas colonnas ed impediments da traffic, quai il purtret sin las vias svizras avant e durant il dis da Pasca. Cunzunt sin il traject nord-sid da l'A2 Gottard e sin l'A13 avertescha l'ASTRA da bler traffic. Er sin vias e trajects che mainan a destinaziuns popularas d'excursiuns e sin las autostradas da la Bassa èsi da quintar cun colonnas e retards.
Tradiziunalmain cumenza il traffic da Pasca gia ina fin d'emna pli baud. Gia a partir dals 27 da mars fa l'Uffizi federal da vias quint cun dapli traffic sin las vias. Quai s'accentueschia lura a partir da mesemna, il prim d'avrigl. La gievgia sontga ed il venderdi sontg èsi d'avair pazienza direcziun sid, l'ASTRA avertescha da colonnas e lung temp da spetga en spezial davant il portal nord dal tunnel da Gottard sco er sin la ruta da San Bernardino.
Traffic da guntgida A13 – amplas duain dar dumogn
Il chantun Grischun optimescha sias mesiras da traffic sin l'autostrada per ils firads da primavaira e las vacanzas da stad. Da nov metta l'Uffizi da construcziun bassa en funcziun quatter ulteriuras amplas fixas che duain impedir che automobilistas ed automobilists svieschan il traffic sin l'A13 e charreschan tras ils vitgs per lung da l'autostrada.
Sper las amplas installescha il chantun er posts supplementars da dosar il traffic sin il St. Luzisteig, a Mastrils ed a Fläsch. Là vegn il traffic reglà a maun, scriva l'Uffizi da construcziun bassa dal Grischun. Quest dispositiv vegnia en funcziun tenor basegn.
Plazzal tranter La Punt/Rehanau e Cuira è a fin
Il plazzal sin l'A13 tranter La Punt/Rehanau e Cuira ch'ha impedì il traffic las ultimas emnas è svanì. Sin dumonda da RTR ha l'Uffizi federal da Vias (ASTRA) ditg che las lavurs sin quest tschancun da l'A13 sajan a fin. Las lavurs per lung l'autostrada vegnian fatgas en etappas.
Per la proxima etappa da lavurs vegnia installà il plazzal tranter Cuira-Nord e Zezras. Ins haja organisà las etappas uschia, ch'i na dettia nagins impediments supplementars durant ils dis da Pasca.
Per laschar passar pli svelt las uras en colonna: