Entant che autras minoritads linguisticas teman per lur existenza e ston cumbatter per lur avegnir, vai cun la Rumantschia e sia organisaziun linguistica Lia Rumantscha (anc) memia bain. E quai fa donn – il pli fitg a la Rumantschia sezza.
- Nus ans pudain para permetter da recrutar entaifer paucs onns dus secretaris generals che ston - suenter curt temp - admetter, uschia capità publicamain almain en il cas da Martin Gabriel, ch'ins na saja betg en il dretg lieu.
- Nus ans pudain para permetter da «prender temp» per reflectar anc ina giada davart il profil da la successura u dal successur e da simplamain «cuntinuar cun la strategia instradada ils ultims onns», sco che quai ha communitgà il co-presidi da la Lia Rumantscha envers RTR. In co-presidi ch’è dapi l’elecziun – almain en la publicitad – ni visibel ni udibel.
- Nus ans pudain para permetter d'esser organisads entaifer la Rumantschia en structuras antiquadas, inveteradas ed er sparpagliadas.
- Nus ans pudain para permetter da discurrer da strategias e da transfurmaziun digitala senza avair ina idea concreta, tge che duai vegnir fatg a curta, media ed a lunga vista.
Incumbensas interessantas na mancan betg. I dovra perquai dentant visiunarias, realisaturs e creadras enstagl da secretaris, administraturas e promoturs.
Gea, i po ir vinavant uschia. Pertge ch'i va anc (memia) bain cun la Rumantschia. Mes giavisch era ed è però in auter:
Empè da perder massa temp cun cultivar il status da victima pudess la Lia ed er autras uniuns far frunt a las sfidas realas. I dovra squitsch permanent sin la politica, projects concrets cun perspectiva e raps enstagl da frasas retoricas davart la transfurmaziun digitala. Enstagl da sa fatschentar cun dispitas e discussiuns davart la lingua en l'intern da la Rumantschia, èsi nairas uras da prender per mauns ideas concretas e curaschusas.
Incumbensas interessantas na mancan betg. I dovra perquai dentant visiunarias, realisaturs e creadras enstagl da secretaris, administraturas e promoturs.
Flavio Bundi
schefredactur RTR
Tge è tes giavisch per la Rumantschia? Tia opiniun? Jau ma legrel sin il barat: flavio.bundi@rtr.ch
