Igl era planisà da disfar la punt or da motivs da segirtad. Damai che la via dal San Bernardino è in vial istoric cun muntada naziunala. Perquai ch'i ha dà divers recurs e la Tgira da monuments dal chantun Grischun ha prendì posiziun a favur da la punt, ha l'Uffizi da construcziun bassa decidì da desister dal project. La punt duai uss vegnir renovada e segirada.
Via forestala a Trun
A Trun po vegnir realisà il project da la via da guaud da las Valettas fin sin l'Alp Nadels. La regenza grischuna ha dà glisch verda e concedì ina contribuziun chantunala da radund 1,4 milliuns francs per il project che custa total 1,98 milliuns.
L'access als guauds da protecziun sin quest territori na satisfa il mument betg a las pretensiuns da segirtad, uschia la regenza. La laina che vegn racoltada sto l'emprim vegnir transportada cun tractor e char annex u cun helicopter e lura vegnir chargiada sin camiuns, quai chaschunia custs auts. Il project prevesa da schlargiar la via da guaud uschia ch'er camiuns pon charrar sin quella.
Via forestala en Stussavgia
La regenza approva il project «Access al guaud Val Stussavgia, via da Calörtsch» e conceda ina contribuziun chantunala da maximalmain 2,36 milliuns francs. Las vias pertutgadas èn sin la vart sanestra da la val ed includan guauds da protecziun, terren agricul e l’abitadi Calörtsch. I n’è betg pussaivel da cultivar il guaud a moda effizienta e la segirtad per tut quels che dovran la via n’è betg pli dada. Sper autras mesiras vegn il vial schlargià e novs plazzals da guntgida construids.