Durant il temp d'advent sa transfurman citads e vitgs en veritablas cuntradas sonoras. Il plaschair en vista a Nadal è en l'aria ed ina tradiziun che vegn vivida intensiv èn ils numerus concerts. E la ritgezza da concerts è fitg gronda. Bleras uniuns da musica e chors fineschan l'onn cun in tal concert d'advent. È quella gronda schelta insatge che fa plaschair u forsa tuttina in pau in stress da stuair sa decider nua ir e nua betg? Nus avain sentì il puls, tant tar visitadras e visitaders da differents concerts, sco er tar las persunas sin e davos tribuna.
Tschertas persunas sa decidan per l'atmosfera festiva da grondas salas da concert, entant che autras prefereschan l'atmosfera intima da baselgias pitschnas. E tar las visitadras e visitaders da differents concerts da la fin d'emna aud'ins anc auters motivs e criteris per la schelta: Da la biadia che chanta en il chor, sur la tradiziun d'ir mintg'onn al concert preferì, in auter criteri po esser l'occurrenza ch'ha lieu il pli da manaivel, tscherts èn spontan e sa laschan inspirar dals inserats en gasetta, autras guardan sin il tema dal concert e sche insatgi ch'ins enconuscha persunalmain stat sin tribuna è quai er in motiv persvadent da visitar in'occurrenza.
Ina da las artistas da renum naziunal ch'è tut onn sin turnea, è Marie Louise Werth, ch'era pli baud da viadi cun ils Furbaz. Ma er per ella saja il temp d'advent e Nadal mintg'onn spezialmain intensiv. Ella haja il sentiment che grad il 2023 saja «tut sin pista» – sco ch'ella di – e quai fetschia forsa schon in pau pli grev d’emplenir las salas da concert. Ma per Marie Louise Werth stat insatge auter en il center. La chaussa principala saja d'astgar far musica, legrar auters e svegliar emoziuns.
Che concerts d'advent n'èn betg mo eveniments musicals, mabain er socials sa mussa fitg sche uffants stattan sin tribuna. Quai è er il cas tar il concert tradiziunal da la STIMMWERKBANDE ensemen cun l'ensemble vocal incantanti. Las chantaduras e chantadurs il pli giuvens han 4-5 onns ed i va enfin tar ils creschids che chantan en il chor d'aut livel, incantanti. Uschia ch'il program da concert è vast e tuttas gruppas profiteschan l'ina da l'autra, manegia il dirigent e manader artistic, Christian Klucker.
Surtut famiglias vegnan ensemen per giudair l'atmosfera da cuminanza. Dentant er autras audituras fidaivlas ed auditurs novs.
Uschiglio faschevan nus mintgamai in concert e quest onn avain nus decidi da far dus, damai che nus avain gì ina gronda dumonda l'onn passà. Ed ils concerts èn prest vendids or, tge che fa natiralmain grond plaschair.
E per Christian Klucker tutga l'organisaziun dal concert d'advent schon prest tar l'affar dal mintgadi.
In tema organisatoric è er la schelta da la data per il concert. Quai enconuscha er Gianign Arpagaus ch'è dirigent dal Chor Viril Baselgia da Savognin. Chattar in termin saja adina fitg grev, damai ch'i ha lieu adina fitg bleras occurrenzas durant l'onn ed er avant Nadal. Perquai haja il chor publitgà fitg baud ils termins da ses dus concerts ed er coordinà els ordavant cun autras uniuns e chors per betg collidar cun autras occurrenzas en la Val Surses.
Turnain da la vallada en citad. L'accumulaziun d'occurrenzas è qua insatge ordinari. Uschia er per la presidenta da la Filarmonia da chombra dal Grischun, Jacqueline Giger Cahannes. Ella crai che mintg'in fetschia en sia sparta insatge.
Questa saira han lieu per exempel bleras occurrenzas, ma quellas na sa concurrenzeschan betg, perquai che quels che vulessan teater van là, quellas che vulessan musica classica vegnan tar nus, ed uschia vinavant ...
E la dumonda per las occurrenzas saja qua – e quai valia per tuttas e betg mo per las atgnas. La presidenta da la filarmonia è persvadida che sche i na dess betg la dumonda, na dessi era betg tantas occurrenzas. Quai na saja nagin fenomen da quest onn, quel dettia i schon adina.
Damai bel ed impurtant che vegnia purschì per ina e mintgin insatge, perquai che las occurrenzas durant il temp d'advent porschian ina buna occasiun per sa recrear da la hectica dal mintgadi.
