Siglir tar il cuntegn

Header

video
Inclusiun: viver autonom en la chasa Convivo
Or da Telesguard dals 01.02.2023.
laschar ir. Durada: 5 minutas 7 Secundas.
cuntegn

Convivo Cuira Viver independent, il pli ditg pussaivel

18 persunas abiteschan en la chasa ch'è vegnida bajegiada avant quatter onns uschia, ch'ils cunabitants e las cunabitantas pon sa mover senza incaps.

Gion Clau Degonda, Johannes Bislin e Gerold Solèr durant la marenda en il Convivo
Legenda: Gion Clau Degonda, Johannes Bislin e Gerold Solèr durant la marenda en il Convivo RTR, Curdin Fliri

Portas cun sensurs infracotschens, badges per avrir portas, la platta da cuschinar che sa lascha auzar e sbassar e buttuns sin autezza dal chalun – endrizzaments che pussibiliteschan in cunabitar pli independent sco pussaivel. La chasa Convivo è vegnida construida l’onn 2018. Sin quatter auzadas abiteschan 18 persunas ch'èn restrenschidas corporalmain e n'han betg in impediment cognitiv.

audio
L'instituziun Convivo
ord Actualitad dals 02.02.2023. Maletg: RTR
laschar ir. Durada: 4 minutas 58 Secundas.

Agid d'in cunabitant

Gerold Solèr ha gidà tar la planisaziun da la chasa. I saja stà impurtant per el e per ils manaders ch'intgin che viva suenter en la chasa po dir, tge ch' è impurtant en il mintgadi. Uschia è el stà part da la cumissiun da construcziun.

Il pli impurtant è che nus avain avunda plaz, ch'igl è pussaivel da sa mover cun la sutga cun rodas.
Autur: Gerold Solèr abitant Convivo

Gerold Solèr ha 46 onns ed è, suenter in accident, dapi 17 onns en la sutga cun rodas. En sia stanza po l'um da Vrin diriger bler cun in program sin ses telefonin. Per exempel far glisch, tschentar en la televisiun e laschar si e giu las storas.

Quai è mes butler, jau n'hai betg da clamar el, cunquai ch'igl è mes telefonin.
Autur: Gerold Solèr abitant Convivo
Gerold Solèr ha gidà tar la planisaziun da la chasa Convivo
Legenda: Gerold Solèr ha gidà tar la planisaziun da la chasa Convivo RTR, Curdin Fliri

Independenza

Per Gion Clau Degonda da Sumvitg èn las lavurs ch'el po far sez impurtantas, sia lezia è da rumir ora la maschina da lavar giu. El ha 38 onns e lavura durant l’emna en in biro, suenter fa el gugent patgific.

Il suentermezdi sun ils blers en chombra per sasez ed er jau fatsch il relaxen.
Autur: Gion Clau Degonda abitant Convivo
Gion Clau Degonda abita dapi 22 onns en cuminanzas d'abitar
Legenda: Gion Clau Degonda abita dapi 22 onns en cuminanzas d'abitar. RTR, Curdin Fliri

Er Johannes Bislin, il manader da Convivo, vul che las cunabitantas ed ils cunabitants pon viver uschè independent sco pussaivel. Dapi 15 onns è el manader da l’instituziun e vesa gronds midaments, per exempel en il traffic public.  

Jau di adina als cunabitants ed a las cunabitantas ch’els stoppian duvrar il traffic public. Uschia vegn quel adattà als basegns da persunas cun impediment.
Autur: Johannes Bislin manader Convivo

RTR actualitad 07:00

Artitgels legids il pli savens