Per l'ina èn dapli persunas en tgira pervia da sintoms da dafraids e corona. Per l'autra dettia en l'aua persa da Cuira ina pli auta concentraziun da virus da corona.
Perquai vala per part in obligatori da mascrinas en l'Ospital chantunal dal Grischun. En stanzas da spetga, stanzas da tgira ed en las chombras da pazientas e pazients èsi da purtar ella, rapporta il schurnal regiunal da SRF.
Dapi l'onn passà vegn la concentraziun da virus en l'aua persa mesirada. En 15 lieus da la Svizra, tranter auter a Cuira, datti tschintg giadas l'emna ina mesiraziun. Sin basa da quella e las ospitalisaziuns decida la cumissiun d'igiena da l'ospital chantunal davart in obligatori.
Cun l'obligatori veglia l'ospital chantunal proteger pazientas e pazients, dentant er las collavuraturas ed ils collavuraturs. Persunal ch'ha sintoms da dafraid sto plinavant ir persul en la pausa, sco ch'il pledader da l'Ospital chantunal dal Grischun di en il schurnal regiunal.
En auters ospitals en la Svizra Orientala, a Son Gagl, a Herisau e tar la Spital Thurgau SA, na datti nagin obligatori da mascrinas, nun ch'ina persuna haja sintoms.
