Siglir tar il cuntegn

Header

cuntegn

Coronavirus Obligatori da mascrinas en Ospital chantunal dal Grischun

L'Ospital chantunal dal Grischun introducescha puspè l'obligatori da mascrinas. L'obligatori vala a partir da venderdi il prim da fanadur. Purtar mascrina ston ins en tut las parts publicas da l'ospital. Quai ha communitgà l'ospital chantunal. Uschia reagescha l'ospital sin las cifras da corona che s'augmentan puspè, ha declerà Dajan Roman, manader da communicaziun da l'ospital chantunal a RTR. Ins haja dentant er reagì sin las decisiuns dals gronds ospitals a Turitg, che han introduci puspè l'obligatori. L'occupaziun sin la staziun normala a Cuira saja s'augmentada levamain. Sin la staziun intensiva saja per il mument dentant ruassaivel.

audio
Dajan Roman: «Cun la mesira vai per proteger collavuraturas sco er pazients»
ord RTR Audio dals 30.06.2022.
laschar ir. Durada: 16 Secundas.

Dumber da cas s'augmentan puspè

L'obligatori da mascrina saja ina reacziun sin las cifras d'infecziun che s'augmentian puspè. En Svizra ed il Principadi da Liechtenstein ha il BAG annunzià mardi entaifer da 7 dis 33'108 novas infecziuns da corona. Il medem mument ha l'uffizi registrà 14 novs mortoris e 300 novas ospitalisaziuns. Avant in'emna ha il BAG anc annunzià 24'704 novas infecziuns, 251 ospitalisaziuns ed 11 mortoris. Cun quai è il dumber da cas s'augmentà entaifer in'emna per 34%. Las ospitalisaziuns èn s'augmentadas per 19,5% cumpareglià cun l'emna avant.

Tar l'obligatori da mascrinas en l'ospital chantunal vegnan pretendidas mascrinas normalas che cuvran bucca e nas. Mascrinas da FFP2 n'èn betg necessarias, ha declerà Roman vinavant. El è segir ch'i vegn bainbaud puspè a dar en tuttas instituziuns da sanadad in obligatori da mascrina.

RTR novitads 09:00

Artitgels legids il pli savens