La populaziun da Cuira ha tratg ils frains ed ha ditg Na al nov credit per la colliaziun directa da la citad si Brambrüesch. Var 54% dals votants e da las votantas da Cuira han refusà il credit per la colliaziun directa da la citad a Brambrüesch, da 40,6 milliuns francs. Avant 7 onns avevan ils da Cuira gì approvà in credit da var 24 milliuns per il project. Per in nov credit aveva la citad dumandà uss, tenor atgnas indicaziuns – surtut pervi dals effects da la chareschia.
Pendiculara Brambrüesch
Cuira: Credit per colliaziun directa Cuira-Brambrüesch
-
GEA
6'669 Vuschs
-
NA
7'766 Vuschs
Brambrüesch è la pendiculara che maina da l'ur da la citad Cuira ad aut a Brambrüesch. Entant ha questa duas parts: ina gondla da Cuira enfin la staziun da mez Känzeli che stat dapi 20 onns. E la part sura, gondlas pitschnas cotschnas che sajan a la fin da lur vita e ston vegnir remplazzadas. Che questa segunda part sto vegnir renovada vesan tuttas dus varts uschia – l'aderenta ed era l'adversari dal nov project.
Cortesi: «Quai è ussa la basa per far insatge raschunaivel a Cuira»
Mario Cortesi dal comité cunter la colliaziun directa è levgia e cuntent ch'il suveran da Cuira ha refusà il credit. Questa decisiun saja la basa per far insatge raschunaivel a Cuira ed haja impedì debits ubain in augment da taglia. Per ils adversaris era il nov project cun in credit da passa 40 milliuns surdimensiunà.
Jau sun persvadì ch'in project pajabel vegn ad avair success. Pertge la colliaziun a Brambrüesch duai restar.
Il cussegl da la citad da l'autra vart ha scrit ch'el prendia enconuschientscha dal resultat da votaziun. El saja stà persvadì d'avair proponì ina soluziun progressiva per las pendicularas. Il cussegl administrativ da las pendicularas Cuira – Dreibündenstein vegnia ussa ad examinar cun l’Uffizi federal da traffic la situaziun e far il pussaivel per tegnair en funcziun ils implants existents sco fin ussa. En cas d’in donn pli grond da la segunda secziun Känzeli–Brambrüesch stuessan las pendicularas da Cuira guardar co proceder.
La presidenta da la cuminanza d'interess Brambrüesch Martina Domenig è trumpada dal resultat da votaziun, ma questa decisiun dal pievel saja d'acceptar. Nus avain fatg bler per persvader il suveran, ma sco i para na vulan ils votants e las votantas betg questa pendiculara.
Jau sun uss fitg spannegiada tge plan ch'ils adversaris han. Sco i para pon ins gea trair quel or dal truclet.
La cuminanza d'interess Brambrüesch restia però positiva e guardia enavant. Il proxim pass saja da guardar tge pussaivladads ch'i dettia per la pendiculara – impurtant saja da salvar la segunda secziun. Tge che capitia cun il credit da 24 milliuns ch'il suveran da Cuira ha gia approvà, na saja il mument betg cler, er betg per Martina Domenig.